د ټولګټو وزارت سرپرست وزیر ملا محمد عیسی ثاني د ياد وزارت یو شمېر مرکزي او تخنیکي رییسانو په ملتيا جنوب غربي او غربي ولايتونو ته د خپل کاري سفر په ترڅ کې نیمروز او هلمند ولایتونو ته هم سفر کړی او په دغه ولایتونو کې یې د یاد وزارت ترکارلاندې پروژو څخه له نږدې لیدنه کړې.
د ټولګټو وزارت سرپرست وزیر لومړی نیمروز ولایت ته تللی او په دغه ولایت کې یې د وریښمو له بندر، سرشیله او چخانسور پُلونو، د زرنج – دلارام مسیر او یو شمیر نورې تر کار لاندې پروژو څخه د لیدنې ترڅنګ د نیمروز ولايت د ټولګټو رياست کار کوونکو سره هم لیدنه کړې او هغوي ته یې لار ښوونه کړې، چې د پروژو د کار چټکتیا او د خلکو ترانسپورتي ستونزو ته دي جدي پاملرنه وکړي، ترڅو د پروژو کار ژر ترژره بشپړ او د خلکو ترانسپورتي ستونزې حل شي.
د ټولګټو وزارت سرپرست وزیر د خپل کاري سفر په بهیر کې هلمند ولایت ته هم سفر کړې او د یاد ولایت د ټولګټو چارو رییس او پرسونل سره یې د لیدو سربیره په دغه ولایت کې د کابل – کندهار لویې لارې له یوې برخې څخه هم لیدنه کړې او د یاد ولایت پرسونل ته یې د کار د چټکتا، غوره کیفیت او ښه والي په اړه لازمې لارښونې کړي.
د يادونې وړ ده؛ په ياد سفر کې د تولگټو وزارت تخنیکي پلاوي د يادو ولایتونو له مالي او تخنیکي څانگو څخه لیدنه او ارزونه کړې او د یادو برخو کار کوونکو ته يې د کار د لا ښه والي په موخه لازمې لارښوونې کړي دي.