د اطلاعاتو او کلتور وزارت د افغان ولس د جهاد د ارزښتونو ساتنې د کميسيون جوړولو خبر ورکړ.
چارواکي وايي؛ دا اداره د دې لپاره جوړه شوې، چې د اشغالګرو پر وړاندې د افغانانو د قربانیو او جهاد له ارزښتونو ساتنه وکړي او دغه فرهنګ راتلونکي نسل ته ولېږدوي.
جهاد هغه ستر ویاړ دی، چې افغانان په وروستیو لسیزو کې د نړۍ دوو سترو ځواکونو ته ماتې پرې ورکړه.
داطلاعاتو او کلتور وزارت مسوولين وايي، چې د افغان مجاهدینو او خلکو د سرښندنې ژوندي پاتې کېدو او ساتنې په موخه یې (د افغان مجاهدينو او افغانانو د جهادي ارزښتونو ساتنې) تر سرلیک لاندې یو کمیسیون جوړ کړ.
د دې وزارت فرهنګي معین وايي، چې په تيرو ۲۰ کلونو کې ۵٠ بهرنيو هېوادونو پر افغانستان يرغل وکړ او د افغانستان په خلکو يې ظلمونه، ناروا او ستم وکړ، خو د افغانستان مجاهد ولس د دغو يرغلګرو پر وړاندې مقاومت او جهاد وکړ، چې يرغلونه يې مات کړل، اوس ددې وخت رارسیدلی چې دغه قربانۍ او سرښندنۍ وساتل شي.
ورته مهال د چارو کارپوهان د جهادي ارزښتونو ساتنه د راتلونکو نسلونو او حکومتونو لپاره یو رسالت بولي.
د یادولو وړ ده چې د اسلامي امارت د سیاسي چارو کمیسیون، د جهادي ارزښتونو د ساتنې کړنلاره، د ارزونې او مطالعې وروسته تایید او تصویب کړه.