د ریاست الوزرا اقتصادي معاونیت وايي؛ د افغانستان اسلامي امارت له هر څه وړاندې د افغانستان د اقتصاد د پیاوړتیا لپاره خپلې هلې ځلې چټکې کړي دي او په دې برخه کې له ټولو هغو لارو چارو ګټه پورته کوي، چې د افغانستان اقتصاد ورسره پیاوړی کیدلی شي.
یوه پکې د هېواد زېربناوو جوړونې لپاره د اړتیا وړ سېمنټو برابرول دي.
یاد معاونیت زیاتوي؛ اسلامي امارت هڅه کوي، چې په دې برخه کې هېواد پرځان بسیا کړي. په همدې موخه یې په هېواد کې د سیمنټو کارخونې بیارغونې او د نویو کارخونو جوړولو ته مخه کړې ده.
د بغلان د غوري، د پروان د جبل السراج، د کندهار د شوراندام، د جوزجان د یتیم تاق او په هرات کې د سېمنټو کارخونې یې ښې بیلګې دي.
د دې معاونیت د معلوماتو له مخې؛ د جبل السراج د سېمنټو کارخونه چې د اسلامي امارت له لوري د ۷۰ میلیونه افغانیو په لګښت ورغول شوه، اوس د بهرني او افغاني شرکت له لوري د شاوخوا ۱۵ میلیارده افغانیو په پانګونې سره پراختیا مومي.
د کندهار د شوراندام د سېمنټو په کارخونه کې ۷ میلیارده افغانۍ او د هرات د سېمنټو په کارخونه کې بیا شاوخوا ۱۰ میلیارده افغانۍ پانګونه کیږي.
د ریاست الوزرا اقتصادي مرستیال ملا عبدالغني برادر اخوند په شتون کې د کانونو او پټرولیم وزارت او د ۷۷ ترکي شرکت ترمنځ د شاوخوا ۱۱ میلیارده افغانیو په پانګونې سره څه موده وړاندې د جوزجان ولایت د یتم تاق د سېمنټو تولیدي کارخونې د جوړولو تړون هم لاسلیک شو.
د دې کارخونو په فعالیت سره به د سېمنټو د تولید کچه لوړه او تر ډېره بریده به د اړتیا وړ سېمنټ په کور دننه تولید شي.
د دې ترڅنګ به زرګونه هېوادوالو ته په مستقیم او غیر مستقیم ډول د کار زمینه هم برابره کړي.
د یادونې وړ ده، چې دوو افغان او چینايي شرکتونو په بلخ ولایت کې د سېمنټو کارخونې د جوړېدو لپاره د ۲۰۰ میلیون ډالرو په ارزښت پانګونې ته هم لیوالتیا ښودلې ده.