د افغانستان اسلامي امارت د یوې اعلامیې په خپرولو سره د کابل کندهار پر لویه لاره د دوو ترافيکي پیښو له امله ژوره خواشیني څرګنده کړې.
په یاده اعلامیه کې ویل شوي: “په خواشینۍ سره خبر شوو، چې د کابل-کندهار په لویه لاره دوې مرګونې ترافیکي پیښې رامنځته شوې، چې له امله یې زموږ ۵۲ هېوادوال شهیدان او ۶۵ نور ټپیان شوي دي.”
اسلامي امارت په یاده پېښه سخته خواشیني څرګنده کړې. د پېښې ټولو شهیدانو ته یې د جنت الفردوس او د ټپیانو لپاره یې د عاجلې شفا غوښتنه کړې ده.
دغهراز ځان یې له ټولو متضررو کورنیو سره په غم کې شریک ګڼلی او د زړه له کومې یې تسلیت ورته ویلی دی.
اسلامي امارت اړوندو ارګانونو ته لارښوونه کړې، تر څو ژر تر ژره دواړه پیښې وڅېړي، دقیق علت یې معلوم او په جدي توګه د داسې ناورینونو د تکرار مخنیوی وکړي.
تېره شپه د کابل-کندهار پر لویه لاره د غزني اړوند سیمه کې دوې ترافیکې پېښې شوې، چې ۵۲ هېوادوال پکې شهیدان شوي.
د غزني د اطلاعاتو او کلتور رییس حمیدالله نثار وایي، چې د کابل-کندهار پر لویه لاره د دې ولایت د مرکز او اندړو ولسوالۍ اړوند ساحو کې د دوه جلا ترافیکي پېښو له امله د ښځو او ماشومانو په شمول ۵۲ هېوادوال شهیدان او ۶۵ نور ټپیان شوي دي.
د ښاغلي نثار په وینا؛ دغه پېښې تېره شپه د تیلو له یوه ټانکر او یو بل باروړونکي موټر سره د دوو ۵۸۰ ډوله مسافر وړونکو موټرو د ټکر له امله رامنځته شوې دي.
د غزنې د عامې روغتیا رییس زرک ځیرک ویلي؛ ۳۰ ټپيان چې روغتیايي وضعیت یې د ډاډ وړ نه و، کابل ته لېږدول شوي دي.