د کډوالو او بېرته راستنېدونکو چارو وزارت د راستنېدونکو افغان کډوالو لپاره د اسانتیاوو او ښه مدیریت په موخه د همغږۍ ناسته وکړه.
په دې ناسته کې د کډوالو او بېرته راستنېدونکو چارو وزیر مولوي عبدالکبیر وویل؛ د راستنېدونکو کډوالو ښه مدیریت، د هغوی ستونزو ته رسېدنه او له ټولنې سره یې اغېزمن ادغام زموږ له لومړیتوبونو څخه دي، چې جدي پاملرنې ته اړتیا لري.
نوموړي زیاته کړه ؛هڅه کوو چې د ټولو اړوندو ادارو او همکارو موسسو په همکارۍ د دغو ستونزو د حل لپاره عملي، ګډ او همغږي ګامونه واخلو.
په ناسته کې په ځانګړي ډول د تورخم، سپین بولدک او نورو سرحدي سیمو وضعیت ته پاملرنه وشوه.
ګډونوالو د هغو کډوالو لپاره چې هېواد ته راستانه کېږي، د لنډمهاله استوګنې ځایونو، بیړنیو روغتیايي خدماتو، د کډوالو د ثبت او تثبیت، او نورو ابتدايي او اساسي خدمتونو د برابرولو پر څرنګوالي هر اړخیزې خبرې وکړې.
همداراز، د ناستې په پای کې د کډوالو او بېرته راستنېدونکو چارو اداري مرستیال په مشرۍ یو پلاوي ته دنده وسپارل شوه، چې په تورخم کې د کډوالو پنډغالی څخه لیدنه وکړي او د شته اسانتیاوو او اړتیاوو په اړه به خپل راپور له وزارت سره شریک کړي.