د کلیو د بیارغونې او پراختیا وزارت وایي، د پکتيا ولایت د کلیو د بیارغونې او پراختیا ریاست له لوري د یاد ولایت په زرمت ولسوالۍ کې د څه باندې لس میلیونه افغانیو په لګښت د اتو پراختیايي پروژو چارې پيل شوې.
یاد وزارت زیاته کړې، په دغو پروژو کې د کلیوالي سړکونو، اوبو لګولو ساختمانونو او محافظوي دیوالونو جوړول شامل دي.
د یادونې وړ ده، چې د یادو پروژو د کار په جریان کې به سلګونه تنه کاریګرو ته د کار زمینه برابره او په بشپړیدو سره به يې په اړوندو برخو کې د یادې ولسوالۍ د اوسېدونکو ستونزې هوارې شي.