د کورنیو چارو وزارت د امنیتي چارو ستر مرستیال ملا محمد ابراهیم صدر د یو لوړ پوړي پلاوي په ملتیا غزني ته سفر کړی او هلته یې د یاد ولایت له والي ملا عبدالصمد جاوید، ملکي او نظامي مسولینو سره د اړیکو او همغږۍ د پیاوړتیا په موخه لیدنه کړې.
په لیدنه کې د غزني والي ملا عبدالصمد جاوید پلاوي ته د ښه راغلاست ترڅنګ ویلي، چې په اسلامي نظام کې اطاعت اصل دی او د مشرتابه له لوري په هر امر او لارښوونه عمل واجب ګڼل کیږي.
دغهراز ملا محمد ابراهیم صدر په دې ولایت کې د امنیتي بنسټونو ترمنځ پر ښې همغږۍ، د امنیت د ټینګښت، د عالیقدر امیرالمؤمنین حفظه الله د فرامینو د پلي کولو او له خلکو سره د نېک چلند په اړه اړوندو ادارو ته اړینې سپارښتنې کړې دي.
د یادونې وړ ده، چې د کورنیو چارو وزارت د امنیتي چارو ستر مرستیال ولایتونو ته د سفرونو په لړ کې تېره ورځ زابل ولایت ته هم سفر کړی و او هلته یې په ورته مسایلو د یاد ولایت له مسولینو سره لیدنې او خبرې کړې وې.