د کلیو بیارغونې او پراختیا وزارت د وزیر ملا محمد یونس اخندزاده په مشرۍ د موسساتو له استازو سره د اوبو او روغتیا ساتنې په تړاو د همغږۍ غونډه وشوه.
په دې غونډه کې د یاد وزارت وزیر ملا محمد یونس اخندزاده، مرکزي رییسانو، د یونیسف دفتر د واش کلسټر مسول او د نورو موسساتو استازو ګډون کړی و.
په پیل کې د کلیو بیارغونې او پراختیا وزیر میلمنو ته د ښه راغلاست ترڅنګ د یادې غونډې د اهمیت په اړه وینا کړې ده.
نوموړي ویلي، اوبه د انسان د ژوند لپاره اړین رول لري او د خوښۍ ځای دی، چې اوسمهال په هېواد کې د اوبو رسولو د سترو پروژو چارې روانې دي.
هغه د اوبو مدیریت ته په اشارې زیاته کړې، چې د اوبو رسولو پروژې باید د خلکو د اړتیاوو پر اساس تطبیق شي. دغهراز زموږ ټولو مسولیت دی چې د هېواد په ګوټ ګوټ کې د خپل ولس لپاره د څښاک پاکې اوبه برابرې کړو.