د ایران مذهبي مشر سید علي خامنهای د امریکا پر سیاستونو سختې نیوکې کړې او ویلي یې دي، چې واشنګټن له پیل راهیسې د ایران د کمزوري کولو او له منځه وړلو هڅه کوي.
نوموړي نن (یکشنبه) خبرداری ورکړ، چې که امریکا یو ځل بیا له ایران سره جګړه پیل کړي، دا جګړه به «سیمهییزه جګړه» وي.
خامنهاي ویلي «امریکا د ایران شتمنیو ته د تمې په سترګه ګوري» نوموړي ټینګار کړی چې د ایران ملت به هر هغه چا ته چې د برید هڅه وکړي، سخت او کلک ځواب ورکړي.
د ایران ستر مشر زیاته کړې، امریکا د فشار، بندیزونو، سیاسي دسیسو او تبلیغاتي جګړې له لارې هڅه کوي چې ایران منزوي او تسلیم کړي، خو د هغه په وینا، د ایران ولس د تېرو لسیزو په اوږدو کې ثابته کړې چې د بهرنیو فشارونو پر وړاندې مقاومت کولی شي.
نوموړي همداراز ټینګار کړی، چې د ایران سیاسي خپلواکي، اسلامي ارزښتونه او ملي حاکمیت د امریکا د مخالفت اصلي لاملونه دي، او دا شخړه به تر هغه دوام ولري څو ایران پر خپلواکه تګلاره ولاړ وي.