د بهرنیو چارو وزیر مولوي امیرخان متقي، د یوناما د نوي مرستیال او د بشري چارو همغږي کوونکي، برونو لامارک، سره د معرفت ناسته ترسره کړه.
د بهرنیو چارو وزارت د معلوماتو له مخې، په دې لیدنه کې برونو لامارک د بشري مرستو د اغېزمن مدیریت او د مرستو د وېش د ښه والي په اړه خپل نظرونه شریک کړل.
مولوي امیرخان متقي د بشري مرستو ترڅنګ د پراختیایي او زېربنايي پروژو د پلي کېدو پر اهمیت ټینګار وکړ او ویې ویل، اسلامي امارت به په دې برخه کې له ملګرو ملتونو سره خپلو همکاریو ته دوام ورکړي.
بلخوا، د یوناما نوي مرستیال د هرکلي له امله مننه وکړه او ژمنه یې وکړه، چې د ورسپارل شویو دندو د اغېزمن ترسره کولو لپاره به خپلې ټولې هڅې وکړي.
نوموړي همدارنګه د افغانستان او ملګرو ملتونو ترمنځ د تعامل او په بېلابېلو برخو کې د همکاریو د لا پراختیا پر اهمیت هم ټینګار وکړ.