د افغانستان – ازبیکستان – قرغزستان – چین د اقتصادي دهلېز له لارې د سوداګریزو توکو ۲۲ کانټینرونه د چین، ازبکستان او اسلامي امارت د استازو په شتون کې د حیرتان سوداګریز بندر کې مسولینو ته سپارل شوي.
د هېواد د اوسپنې پټلۍ ادارې رییس مولوي بخت الرحمن شرافت ویلي، یاد توکي په ۲۲ کانټینرونو کې د اورګاډي په واسطه له قرغزستان، ازبیکستان او چین هېوادونو څخه په تېرېدو د حیرتان سوداګریز بندرته رارسېدلي، چې دا کار د سوداګرۍ له پلوه د یادو هېوادونو ترمنځ یو ستر ګام دی.
نوموړي ډاډ ورکړی، چې د دغه رياست په پرله پسې هڅو سره افغانستان اوس د اورګاډي له لارې له ټولو ګاونډيو هېوادونو په ځانګړې توګه ازبیکستان او ايران سره نښلول شوی دی.
د ازبیکستان د اوسپنې پټلۍ ادارې مرستیال رحمت الله اوف د سوداګریزو ملکیتونو انتقال د رېل پټلۍ په تاریخ کې مهم بللی او د ریل پټلۍ له لارې یې د سوداګریزو ملکیتونو د انتقال پر پراختیا ټینګار کړی.
نومړي زیاته کړې؛ چې په نږدې راتلونکي کې به افغانستان د اورګاډي د کرښې له لارې له پاکستان سره هم ونښلول شي.
۲۰ ورځې وړاندې هم د هرات د رېل پټلۍ له لارې له چين څخه هېواد ته د سوداګريزو توکو ٤٢ کانټينرونه راوړل شوي وو.