د امریکا ولسمشر جو بایډن او د دې هېواد د راتلونکو ولسمشریزو ټاکنو نوماند پر خپله اېکس پاڼه لیکلي، چې راتلونکو ټاکنو کې له نوماندۍ تېرېږي.
نوموړي ویلي، چې دا کار یې د هېواد او ګونډ په ګټه کړی دی.
بایډن زیاته کړې، چې د روانې اونۍ ترپایه به خپلو خلکو ته د دې پرېکړې لا ډېر جزیات ورکړي.
په دې وروستیو کې د ډیموکراټ ګوند ډېری غړو له کاندېدۍ د نوموړي د تېرېدو غوښتنه کړې وه.
دا غوښتنه هغه وخت ډېره شوه، کله چې بایډن ته له ټرمپ سره په مناظره کې د کمزورۍ ګوته ونیول شوه.
بایډن خپله لومړۍ مرستیاله کمېلا هاریس دغو ټاکنو ته وړاندیز کړې او ملاتړ یې ترې اعلان کړی دی.
د امریکا ولسمشر تېره اونۍ د کرونا له تشخیص وروسته خپل کور ته ستون شوی.
نوموړي ویلي، چې د ولسمشر په توګه به د اوسنۍ دورې تر پايه خپلې دندې ته دوام ورکړي.
جو بایډن به د ۲۰۲۵م کال جنوري میاشتې تر ۲۰مې د امریکا ولسمشر وي.
د دې هېواد ولسمشریزې ټاکنې به د ۲۰۲۴ نومبر میاشتې په پینځمه تر سره شي.