د ریاست الوزرا سیاسي معاونیت د دفتر عمومي رییس مولوي ذاکر الله ذاکر په کابل کې د یوناما د سیاسي برخې له مشر سکاټ سمټ سره لیدنه کړې.
په دې لیدنه کې سکاټ سمیټ ویلي، د دوحې په درېیمه ناسته کې د اسلامي امارت د ګډون مخالف هېوادونه د ناستې له پایلو خوښ وو او ډېر موضوعات ورته روښانه شوي دي.
نوموړي زیاته کړې، د یوناما او اسلامي امارت تر منځ د باور ښه فضا شته او هیله ده، چې له نړۍ سره هم د اسلامي امارت تعامل پیاوړی او په نورو اغېزناکو چارو هم فکر او کار وشي.
سکاټ سمیټ څرګنده کړې، یوناما به په نږدې ورځو کې د افغانستان په اړه د ملګرو ملتونو د امنیت شورا ته خپل راپور وړاندې کړي.
د ریاست الوزرا سیاسي معاونیت د دفتر عمومي رییس په بېلا بېلو برخو کې د یوناما له همکاریو په مننې ویلي، ناستې او بحثونه د اسلامي امارت او نړیوالې ټولنې د نږدې کېدو سبب کېدای شي او افغان حکومت غواړي شته مسایل د خبرو له لارې حل کړي.
مولوي ذاکر الله ذاکر زیاته کړې، اسلامي امارت په هېواد کې د مېشتو ټولو بهرنیو ډیپلوماتانو کار ته احترام لري او له هغوی غواړي چې شته اصولو ته درناوی وکړي.
نوموړي ویلي، اسلامي امارت د اسلام په رڼا کې بشر حقونو ته درناوی لري، په افغانستان کې قوانین د دین پر بنسټ جوړیږي او د اندېښنې وړ موضوع نه لري.
په پای کې ښاغلي ذاکر د دوحې د درېیمې ناستې د ژمنو د عملي کېدو یادونه کړې او ویلي یې دي، اسلامي امارت له نړۍ سره خبرو او اړیکو ته لومړیتوب ورکوي.