د روغتیا نړیوال سازمان (WHO) وايي؛ اسرائیلو غزه کې د پولیو ضد واکسین درې ورځني کمپاین پر مهال د جګړې درېدل تایید کړي.
یاد سازمان زیاته کړې؛ په درېیو ورځو کې به د سهار له شپږو تر ماسپښین درې بجو پورې په جګړه کې وقفه وي.
دې سازمان ویلي؛ غزه کې به د سپټمبر له لومړۍ نېټې د ګوزڼ ضد واکسین کمپاین پل شي، چې په ترڅ کې به يې جګړه درېدلې وي.
دا په داسې حال کې ده، چې تېره اوونۍ په غزه کې د یوې لس میاشتنۍ ماشومې د ګوزن خبر ورکړل شوی و.
د ملګري ملتونو د معلوماتو له مخې، غزه کې باید ۶۴۰ زره اوسېدونکي ماشومان واکسین کړل شي.
حماس ډلې هم د ګوزڼ ضد واکسین لپاره د ملګرو ملتونو لخوا د یاد اوربند غوښتنې هرکلی کړی.