کرملین ماڼۍ ویلي، چې د روسیې ولسمشر ولادیمیر پوتین مغولستان ته سفر کړی.
ټاکل شوې چې نوموړی به نن سېشنبه د مغولستان له ولسمشر اوخنا خورلسوخ سره لیدنه او په دوه اړخیزو اړیکو خبرې وکړي.
دا د پوتین لومړنی رسمي سفر دی، چې د جرمونو نړیوالې محکمې غړي هېواد ته ځي.
د جرمونو نړیوالې محکمې نږدې ۱۸ میاشتې وړاندې اوکراین کې د دوی له قوله د “جنګي جنایاتو” په تور د روسیې د ولسمشر د نیولو حکم صادر کړ.
له دې سره هممهاله اوکراین له مغولستان څخه غوښتي، تر څو پوتین ونیسي او لاهه نړیوالې محکمې ته یې وسپاري.
مغولستان د چین او روسیې تر منځ پروت کمنفوسه هېواد دی، چې د سون توکو او برېښنا له اړخه په روسیه او د کانونو په برخه کې د پانګونې له اړخه په چین پورې تړلی ګڼل کېږي.