د بهرنیو چارو وزارت له سیاسي مرستیال شېر محمد عباس ستانکزي سره د چین هېواد د سفیر مرستیال باؤ ژو هوی لیدنه کړې.
بهرنیو چارو وزارت وايي؛ په دې لیدنه کې د افغانستان او چین په دوه اړخیزو سیاسي، اقتصادي او فرهنګي همکاریو او وروستیو سیمه ېیزو پرمختګونو خبرې وشوې.
یاد وزارت زیاته کړې، شېر محمد عباس ستانکزي له افغانستان سره د چین د مرستو له مننې سربېره د افغانستان او چین دوه اړخیزې اړیکې مهمې بللي او د پیاوړتیا هیله یې څرګنده کړې.
باؤ ژو د چین او افغانستان د دوه اړخیزې همکارۍ او په بېلابېلو برخو کې یې د پرمختګونو یادونه کړې او ویلي يي دي؛ هېواد یې غواړي چینايي سوداګر په افغانستان کې پانګونې ته تشویق کړي او له افغانستان سره یې د خپلو اړیکو ټینګښت ارزښتمن یاد کړی.
نوموړي ډاډ ورکړی، چې په نړیوال سټېج به د اسلامي امارت ملاتړ ته دوام ورکوي.
په پای کې ښاغلي عباس ستانکزي د دواړو هېوادونو د اړیکو پر پیاوړتیا او دوام ټینګار کړې او ویلي يي دي، چې دوه اړخیزې ګټې دې مثبتې وپالل شي.