د احصایې او معلوماتو ملي اداره وایي؛ د روان ۱۴۰۳ کال په زمري میاشت کې د خوراکي توکو په بیو کې ۱.۴ سلنه ټیټوالی راغلی دی، چې له دې ډلې ۱.۶ سلنه د غوړیو، ۲.۲ سلنه د مېوو او ۶.۹ سلنه د سابو په بیو کې دی.
له بلې خوا د غیرخوراکي توکو په بیو کې ۱.۲ سلنه زیاتوالی ښکاري، چې ۲.۱ سلنه یې د جامو او ۱.۹ سلنه یې د کور سامان په بیو کې راغلی دی.
د روان کال په زمري میاشت کې د لګښتي توکو د بیو شاخص میاشتنی پړسوب ۰.۲ سلنه زیاتوالی ښيي، چې د پړسوپ دا زیاتوالی تر ډېره د خوراکي توکو (غوښه) او غیرخوراکي توکو (جامې او کورسامان) د بیو د زیاتوالي له امله دی.
همدارنګه د ټکي په ټکي پړسوب له مخې د ۱۴۰۳ کال په زمري میاشت کې د تېر کال د همدې میاشت په پرتله ۵.۶ سلنه ټيتوالی ښکاري.
بل خوا د روان کال په زمري میاشت کې د امریکايي ډالرو پر وړاندې د افغانۍ ارزښت په منځني ډول ۷۱.۰ افغانۍ و، په داسې حال کې، چې یاد ارزښت په چنګاښ میاشت کې ۷۱.۱ افغانیو ته رسېده.
که د افغانیو ارزښت د تېر کال له ورته دورې سره پرتله شي نو ښکاري، چې د امریکا ډالرو پر وړاندې د افغانیو په ارزښت کې ۱۶.۴ سلنه زیاتوالی راغلی دی.