د رییس الوزرا ملا محمد حسن اخوند د حکم په اساس د برېښنایي پېژندپاڼو په وېش کې د اسانتیاوو برابرولو او د چارو د هر اړخیز ښه والي په موخه ځانګړې کمېټه وټاکل شوه.
د ریاست الوزرا د دفتر عمومي ریاست د مرستیال مفتي سید احمد مستقیم په مشرۍ یاده کمېټه به چې د بېلا بېلو وزارتونو استازي مولوي عبدالکریم فاتح، مفتي نورالله ربیعه، مولوي عبدالاحد طیب او د احصایې او معلوماتو ملي ادارې دوه تنه لوړپوړي مسولین یې غړي دي، د برېښنایي پېژندپاڼو په وېش کې د ګڼې ګوڼې د کمښت، د اړینو اسانتیاوو برابرولو او د پېژندپاڼو د وېش د ټول بهیر په اړه د خپلو څېړنو او موندنو راپور د ریاست الوزرا مقام ته وړاندې کوي.
اسلامي امارت هېوادوالو ته د برېښنایي پېژندپاڼو د اسانه ترلاسه کولو په موخه د جدي اقداماتو او اړینو اسانتیاوو د برابرولو کوښښ کوي.
تر دې وړاندې د محترم رییس الوزرا په لارښوونه ځانګړي پلاوي د پاسپورټونو د وېش د نویو مرکزونو په جوړولو سره ګڼه ګوڼه کمه او په هغه برخه کې هېوادوالو ته اسانتیاوې رامنځته کړې.