د کندهار ولایت کرنې ریاست وايي، دې ولایت کې د ریحانو کرکیله زیاته شوې چې ورسره د شاتو د مچیو فارمونو وده کړې.
یاد ریاست زیاته کړې؛ چي په دامان، ژړۍ، پنجوايي، ارغنداب او یو شمیر نورو کرکیلو ولسوالیو کې د شاتو د مچیو ۷۵ څخه تر ۱۰۰ پوري فارمونه شتون لري.
د اټکل له مخې به سږ کال شاوخوا ۸۰ زره کیلو ګرامه شات تولید شي، چې دا اټکل د تېر کال د تولید دوه برابره دی. تېر کال په دې ولایت کې ۴۰ زره کیلو ګرام شات تولید شوي وو.
په دې ولایت کې ۱۰ ډوله شات تولیدیږي، چي پکښي د ریحان، شوبین، مالټې، سپلني، بیري، ترخ، بلوڅ، ولي، لمر ګلی او وحشي شات شامل دي.
د یادونې وړ ده، چې د ریحان شات په نړیوالو بازارونو کې په لوړه بیه پیرل کیږي.