بهرنیو چارو وزارت د یوې اعلامیې په خپرولو سره د قرغیزستان جمهوريت له لوري د ممنوعه ډلو له ليست څخه د افغانستان اسلامي امارت نوم ایستل د ستاینې وړ ګام بللی او هرکلی یې کړی دی.
په یاده اعلامیه کې ویل شوي: “د نورو هېوادونو په تسلسل د قرغیزستان دا ګام په سیمه او نړۍ کې د افغانستان اسلامي امارت په تړاو د سیاسي درک د رامنځته کېدو ښکارندوی دی او د اسلامي امارت او نورو هېوادونو ترمنځ د دوو اړخيزو اړيکو د لا پیاوړتيا په لاره کې د خنډ د لرې کېدو په مانا دي.”
له دې وړاندې قزاقستان هم اسلامي امارت له ممنوعه لیست څخه ایستلی و.
دغهراز څه موده مخکې د روسیې د بهرنیو چارو وزارت ویاندې ماریا زاخارووا ویلي، چې هېواد یې د ممنوعه سازمانونو له نوملړه د اسلامي امارت د نوم ایستل او له اسلامي امارت سره د اړیکو ټینګول یوه اړتیا بولي.
ماریا زاخارووا ټینګار کړی و؛ هغه کسان چې په دې اقدام نیوکه کوي، له واقعیت څخه سترګې پټوي.
له دې وړاندې د روسیې ولسمشر ولادیمیر پوتین هم له اسلامي امارت سره د اړیکو په ټينګولو ټینګار کړی و.