د افغانستان بانک عمومي رییس نور احمد اغا د افغانستان بانک له څانګو څخه د لیدنې په موخه ولایتي سفرونو په لړ کې د سرپل او جوزجان ولایتونو له څانګو څخه له نږدې لیدنه کړې.
په دې سفر کې د افغانستان بانک رییس په یادو څانګو کې د افغانستان بانک له کارکوونکو غوښتي، چې د درنو هېوادوالو لپاره د ښو خدمتونو د وړاندې کولو زمینه برابره کړي، ترڅو درانه هېوادوال پر وخت له غوره بانکي خدمتونو برخمن شي.
نور احمد اغا ویلي، د افغانستان بانک د مالي او بانکي خدمتونو د پراختیا لپاره ژمن دی او په همدې موخه یې تر دې مهال د هېواد په یو شمېر هغو سیمو کې چې له دې وړاندې هلته مالي او بانکي خدمتونه شتون نه درلود، نوې څانګې پرانیزي.
د یادونې وړ ده، چې د افغانستان بانک د عمومي رییس نور احمد اغا د روانې اونۍ په پیل کې د دې بانک له څانګو څخه د نږدې لیدنې او درنو هېوادوالو ته د غوره مالي او بانکي خدمتونو د وړاندې کولو په موخه سفر پیل کړی، چې تر دې مهاله یې د میدان وردګ، بامیان، غور، سرپل او جوزجان ولایت له څانګو څخه یې لیدنې کړي او مسولینو ته یې اړینې لارښونې کړي دي