مالیزیا کې د اسلامي امارت لوی سفیر او د بهرنیو چارو وزارت لومړي سیاسي رییس د افغانستان لپاره د مالیزیا له ځانګړي استازي سره لیدنه کړې.
د بهرنیو چارو وزارت لومړي سیاسي رییس مفتي نور احمد نور او په مالیزیا کې د اسلامي امارت لوی سفیر نقیب الله احمدي په دې هېواد کې د اسلامي امارت لوی سفارت په دفتر کې د افغانستان لپاره د مالیزیا له ځانګړي استازي داتو احمد اعظم سره په ګڼو موضوعاتو خبرې کړې دي.
په دې لیدنه کې د افغانستان د وروستیو سیاسي، امنیتي او اقتصادي حالاتو په اړه هر اړخیز بحث شوی او راتلونکي کې د اړیکو د پراختیا، د ډیپلوماټیک تعامل د کچې لوړولو، کابل کې د سیاسي حضور په پیلولو او ګڼو نورو ورته موضوعاتو خبرې شوې دي.
همداراز په یاده لیدنه کې له ګاونډیو او د سیمې له هېوادونو سره په اړیکو په ځانګړي ډول په سیاسي برخه کې د پرمختګونو په اړه خبرې شوي او غوښتنه شوې، چې دغه پرمختګونو ته په کتو مالیزیا هم همکارۍ ته پراختیا ورکړي.
داتو احمد اعظم له افغانستان سره د مالیزیا د لومړي وزیر په لېوالتیا خبرې کړي او هیله یې څرګنده کړې، چې د مالیزیا لوړ پوړي چارواکي کابل ته سفر وکړي.