د اسلامي امارت ویاند په خپلو تازه څرګندونو کې ویلي، چې د پاکستاني چارواکو له لوري په دغه هېواد کې له مېشتو افغان کډوالو سره روان چلند د منلو وړ نه دی.

د اسلامي امارت ویاند مولوي ذبیح الله مجاهد پاکستان کې له افغان کډوالو سره ناسم چلند د نه منلو وړ بللی او له پاکستانی لوری یې غوښتي، چې په دې اړوند باید په خپل پلان باندې له سره غور وکړي.

ښاغلي مجاهد ویلي، چې افغان کډوال د پاکستان په امنیتي ستونزو کې لاس نه لري او د پاکستان حکومت باید له دې هېواد څخه په خپله خوښه او ارامه د افغان کډوالو تر وتلو زغم وکړي.

‏دا په داسې حال کې ده، چې تیره ورځ د پاکستان د چارسمبالي لومړي وزیر انورالحق کاکړ په مشرۍ د کابینې په غونډه کې له دغه هېواد څخه په جبري توګه د افغان کډوالو د ایستلو پرېکړه وشوه.

د باميانو ولایت د اطلاعاتو او کلتور رياست مسولين ویلي، بامیانو د لرغوني ښار ضحاک د بیارغونې چارې پیل شوې.

د باميانو ولايت د اطلاعاتو او کلتور ریيس مولوي صفي الله رائد ویلي، دغه پروژه د يونيسکو موسسې له لوري پيل شوې او د دغه رياست په همکارۍ او څارنه به يې کارونه د دو مياشتو په جريان کې پای ته ورسېږي.

د ښاغلي رائد په وینا، دا ډول پروژې د باميانو د تاريخي ابداتو د ساتنې او دوام لپاره ډېرې مهمې او ارزښتمنې دي.

 نوموړی زیاتوي؛ چې د باميانو د اطلاعاتو او کلتور رياست هڅه کوي، ترڅو هغه موسسې دې ولايت ته راولي، چې د لرغونو اثارو د ساتنې په برخه کې کار کوي.

د امریکا متحده ایالاتو د استازو جرګې مشر کېون مک‌کارټي له دندې ګوښه شو.

دا اقدام د امریکا په تاریخ کې بې سارې دی او دا لومړی ځل دی، چې د امریکا کانګرس د استازو جرګې مشر د استیضاح له لارې بې‌واکه کېږي.

په دې پروسه کې د جرګې ټولو غړو رایه کارولې، چې شاوخوا ۲۱۶ استازو د نوموړي په مخالفت او بې‌واکه کېدو لپاره رایه ورکړې ده.

د مک‌کارټي د ګوښه کولو پروسه د استازو مجلس جمهوري غوښتونکي غړي مات ګېتز په غوښتنه پيل شوې وه.

په یاده جرګه کې د ګېتز په مشري ښې اړخي جمهوریپال مک‌کارټي ته په غوسه وو، چې ګواکې له دیموکراتانو سره یې د فدرال ادارو لپاره د لنډمهاله بودیجې په تصویبېدو کې همکاري کړې ده.

د پکتیا د کلیو، بیارغونې او پراختیا ریاست مسولین ویلي، چې د مرکز ګردېز په بېلابېلو کلیو کې د یونفس موسسې په مالي ملاتړ د ۳۰ میلیونو ۹۱۷ زره او ۶۲۱ افغانیو په لګښت د ۲۴ پروژو چارې پیل شوي.
د دغه ولایت د کلیو بیارغونې او پراختیا رییس مولوي میرزاجان صادق ویلي، چې دغه پروژې د ګردېز په ۱۸۵ کلیو کې په ساتنې او مراقبت، سړکونو د بیارغونې، پلونو، د اوبولګولو، ترانسپورټ او نورو برخو کې پلې کېږي.

 ټاکل شوې چې د یادو پروژو چارې په راتلوونکو دریو میاشتو کې بشپړې شي.
د خلکو په مشرۍ د پرمختګ موسسې ولایتي مسول اسماعیل ظریفي ویلي، چې له دې سره یو زر او ۹۶۷ ځايي اوسیدونکو ته د کار زمېنه هم برابرېږي.
د کلیو، بیارغونې او پراختیا ریاست مسولینو په وینا؛ د دغه پروګرام ټوله بودیجه ۲۶۵ میلیونه امریکایي ډالر ده، چې د ملګرو ملتونو د پروژوي خدماتو دفتر یا UNOPS یې په افغانستان کې پلې کوي.
د مرکز ګردېز اوسېدونکو د دغو پروژو چارو پیلیدو څخه خوښي ښودلې او ویلي يي دي، چې دې سره به کاري زمينې ورته برابرې او عملي کېدو سره به يې ګڼې اسانتیاوې رامنځته شي.

د کندهار د سوداګرۍ او پانګوني خوني نشراتي مسول نور الله نوري وایي؛ چي د روان کال په شپږو میاشتو کي نهه زره ټنه شکرپاره د کندهار څخه بهرنیو هېوادونو په خاص ډول هند او چین ته صادره شوې او لاهم دوام لري.

د ښاغلي نوري په وینا، چې ممکن د کال تر پایه شاوخوا ۲۰ زره ټنه شکر پاره خارجي مارکیټونو ته صادره شي.

د ملګرو ملتونو د سرمنشي ځانګړې استازې او د يوناما مشرې روزا اتونباييفا د بهرنيو چارو وزارت له سياسي مرستیال شير محمد عباس ستانکزي سره لیدنه کړې.

په ناستې کې د سيمه ييزې همغږۍ، د مخدره موادو پر ضد مبارزې، د خصوصي سوداګريز او بانکي سکتور د احيا پر لارو چارو، د ماين پاکۍ فعاليتونو، او نورو موضوعاتو په اړه خبرې شوي.

روزا اتونباييفا ملګرو ملتونو ته د خپل وروستي سفر په اړه معلومات وړاندې کړي او زیاته کړې یې ده؛ دوی هڅه کوي چې د غذايي امنيت تر څنګ د مخدره موادو پر وړاندې مبارزې، د روږدو د درملنې، او مشروع کښتونو د ترويج په برخې کې د نړيوالو مرستې را جلب کړي.

د بهرنيو چارو وزارت سياسي مرستیال ویلي، چې په ځينو برخو کې د نظر له توپير سره سره د دې اړتيا ده، چې په اتفاقي موضوعاتو کې ګډ کار وشي او افغانستان د ملګرو ملتونو په ګډون بيلابيلو نړيوالو فورمونو کې د ګډون حق ور کړل شي. شير محمد عباس ستانکزي زیاته کړې؛ چې بشري چارې بايد له سياست څخه بېلې وساتل شي او اجازه ور نه کړل شي، چې سياسي توپيرونه د بشري مرستو، مخدره موادو پر وړاندې مبارزې، ماين پاکۍ او نورو برخو کې د تعامل پر وړاندې خنډ واقع شي.

د بهرنیو چارو سرپرست وزیر مولوي امیر خان متقي چین ته د خپل سفر په ترڅ کې د سیچوان د انرژي پانګونې د پراختیا له شرکت څخه لیدنه کړې.

ښاغلي متقي د دغه شرکت له مسولینو سره د افغانستان او چین ترمنځ د برېښنا د همکاریو په اړه خبرې کړي.

د بهرنیو چارو سرپرست وزیر زیاته کړې، چې افغانستان د اوبو، باد، لمریزې او ډبرو سکرو د انرژي لوی ظرفیت لري او په افغانستان کې د چین په ګډون د بهرنیو شرکتونو او پانګوالو د پانګونې لپاره مناسب چاپېریال برابر شوی دی.