په اسلو کې د اسلامي امارت د سفارت سرپرست نجیبالله شاهین د ناروې د بهرنیو چارو وزارت د سویلي اسیا او افغانستان د څانګې له رییس سیګبیورن تنفیورد سره لیدنه کړې.
ناروې کې د افغانستان سفارت وایي، چې په دې لیدنه کې د دوه اړخیزه سیاسي اړیکو د پیاوړتیا، بشري مرستو او یو شمېر نورو موضوعاتو په تړاو خبرې شوې دي.
د سرپل ښار پنځه څلورلارې (استقلال، مطبوعاتو، فرهنګ، وحدت او د ښار مرکز) په رسمي نومونو ونومول شوې.
د اطلاعاتو او کلتور وزارت وايي، د یادو څلور لارو نوم ایښودنه د سرپل ولایت مقام د وړاندیز پر بنسټ، د اطلاعاتو او کلتور وزارت د څلورلارو او مقدسو ځایونو د نوم ايښودنې کمېسیون له لوري تر ارزونې او منظورۍ وروسته تر سره شوه.
د دې اقدام موخه د فرهنګي او ملي هویت پیاوړتیا، ټولنیز انسجام، ښاري نظم او د پتې موندنې په برخه کې اسانتیا رامنځته کول ښودل شوي دي.
ورته مهال، د سرپل اوسېدونکو هم دا اقدام د ښاري نظم د ښه والي او د دې ولایت د فرهنګي او ټولنیزو ارزښتونو د انعکاس په برخه کې یو مثبت ګام یاد کړ.
د هرات د اطلاعاتو او کلتور ریاست مسوولین وایي، چې د هرات د لوی جامع جومات د پارک جوړېدو چارې بشپړې شوې او ډېر ژر به ګټې اخیستنې ته وسپارل شي.
په وینا یي، اوس مهال په یاد ولایت کې د نورو تاریخي ابدو رغنیزې چارې په دوامداره توګه جریان لري.
ورته مهال د ترکیې د همکارۍ او همغږۍ ادارې (ټیکا) چې د یاد پارک رغنیزې چارې یې ترسره کړي ویلي، چې له تاریخي او فرهنګي پروژو څخه ملاتړ د دې ټولنې له ژمنو څخه شمېرل دي.
د یادونې وړ ده چې د تاریخي آبداتو ساتنه او بیا راژوندي کول د اسلامي امارت له اساسي لومړیتوبونو څخه دي، دا مهال د یاد ولایت په بېلابېلو سیمو کې د یو شمېر تاریخي آبداتو د بیا رغونې چارې روانې دي.
د اسلامي امارت مرستیال ویاند ملا حمدالله فطرت وایي، چې د عالیقدر امیرالمؤمنین حفظه الله په مشرۍ د کډوالو ستونزو ته د رسیدنې عالي کمیسیون له ځانګړې ناستې وروسته د دایمي مېشتېدنې کمیټې له لوري کډوالو ته د ځمکو د وېش بهیر چټک شوی.
ښاغلی فطرت زیاتوي، چې تر دې مهاله د بېلابېلو ولایتونو د کډوالو په ښارګوټو کې په جبري توګه راستنو شویو هېوادوالو ته ۳ زره او ۴۶ نومرې ځمکه وېشل شوې او د نورو ته د وېش لړۍ روانه ده.
نوموړی زیاتوي، چې د دې سربېره راستنو شویو کډوالو ته د خوراکي، غیرې خوراکي او نغدي ژمنیو مرستو بهیر هم چټک شوی دی.
د ایران د بهرنیو چارو وزیر سید عباس عراقچي او ملګرو ملتونو سازمان سرمنشي انتونیو ګوترش په یوه ټلیفوني اړیکه کې د سیمې او نړیوالو بدلونونو په اړه خبرې کړي.
د ایران د بهرنیو چارو وزارت ویلي، عراقچي د دې ټلیفوني اړیکې پر مهال په خپل هېواد کې د وروستیو ناارامیو په اړه د امریکا او د اسراییلو د رژیم ملاتړ ته په اشارې سره د ملګرو ملتونو له لوري د دغو کړنو د کلکې غندنې غوښتنه کړې.
دغه راز بهرنیو وزارت د ملګرو ملتونو د امنیت شورا کې د ایران د موضوع د مطرح کولو په اړه د امریکا پر اقدام نیوکه کړې او د وګړو د حقونو پر درناوي او د ملي امنیت پر ساتنې د ایران پر ژمنتیا یې ټینګار کړی دی.
له بلې خوا د ملګرو ملتونو سرمنشي هم ویلي، چې هېوادونو باید د نورو هېوادونو په کورنیو چارو کې لاس وهنه ونه وکړي او دغه راز د ملګرو ملتونو د منشور پر مراعات او د زور له کارولو د ډډه کولو پر اړتیا یې ټینګار کړی دی.
روسیه کې د افغانستان سفارت وایي، چې د روسیې ولسمشر ولادیمیر پوتین د اسلامي امارت د سفیر مولوي ګل حسن حسن په ګډون د څو هېوادونو د سفیرانو د باورلیکونو د منلو پر مهال افغانستان کې د امنیت د ټینګښت او د نشهیي توکو سره د مبارزې په برخه کې وروستۍ هڅې ستایلي.
پوتین ویلي، چې روسیه د یوه متحد، خپلواک او سولهییز افغانستان ملاتړ کوي او د سیمهییز ثبات، امنیت او رغنده تعامل په پیاوړتیا باور لري.
د یادونې وړ ده، چې ولادیمیر پوتین تېره ورځ د یو لړ مراسمو پر مهال په مسکو کې د اسلامي امارت سفیر مولوي ګل حسن حسن باورلیک ومانه.
ابوظبي کې د اسلامي امارت سفیر مولوي بدرالدین حقاني په متحده عربي اماراتو کې له مېشتو یو شمېر افغان مخورو او سوداګرو سره وکتل.
متحده عربي اماراتو کې د افغانستان سفارت وایي، په دې کتنه کې افغان مخورو او سوداګرو د اسلامي امارت څخه ملاتړ خپله اسلامي او اخلاقي دنده بللې.
دغه سفارت زیاتوي، چې د دې سربېره دوی د یو لړ سوداګریزو ستونزو په شریکولو سره په متحده عربي اماراتو کې د افغان کاریګرو د حقونو او ملاتړ په برخه کې د سفارت د ځانګړې پاملرنې غوښتنه وکړه.
ورته مهال مولوي بدرالدین حقاني په اماراتو کې د مېشتو هېوادوالو خدمت او د هغوی له مشروع حقونو ملاتړ او په دې برخه کې د هر راز اسانتیاوو رامنځ ته کول خپل لومړیتوب وباله او د افغان سوداګرو د شته ستونزو د حل په برخه کې یې د هر اړخیزه هڅو ډاډ ورکړ.
ټاس خبري اژانس راپور ورکړی، چې د روسیې ولسمشر ولادیمیر پوتین په یوه ټلیفوني اړیکه کې د اسرائیلو له لومړي وزیر بنیامین نتانیاهو سره د منځني ځتیځ په ځانګړې توګه د ایران د اوسني وضعیت په تړاو خبرې کړي.
راپور کې د کریملین په خواله ویل شوي، چې په دې ټلیفوني اړیکه کې پوتین د سیمې د ثبات او امنیت لپاره د سیاسي او دیپلوماتیکو هڅو پر پیاوړتیا ټینګار کړی دی.
پوتین دغه راز ویلي، چې روسیه چمتو ده، چې د ټولو لېواله هېوادونو ترمنځ د رغنده خبرو اترو منځګړیتوب وکړي.
