قطر کې د افغانستان سفیر محمد سهیل شاهین د قطر پوهنتون رییس ډاکټر عمر بن محمد الانصاري سره لیدنه کړې.

قطر کې د افغانستان سفارت وایي، چې په دې لیدنه کې د کابل او قطر پوهنتونونو ترمنځ د همکاریو پر پراختیا خبرې شوې دي.

دغه راز لیدنه کې د افغاني او قطر د اکاډمیکو بنسټونو ترمنځ د تجربو تبادلې، اسلامي بانکدارۍ، ورکشاپونو او اړوند نورو موضوعاتو په اړه هم بحثونه شوي دي.

د لوړو زده کړو او مالیې وزارتونو د استازو ترمنځ د ګډو همکاریو هوکړه‌لیک د یو لړ مراسمو په ترڅ کې لاسلیک شو.

د یاد هوکړه‌لیک د لاسلیک په مراسمو کې د لوړو زده کړو وزارت علمي مرستیال شیخ ضیاءالرحمن مدني، د مالیې وزارت اداري مرستیال شیخ دوست محمد مخلص او یو شمېر رییسانو ګډون درلود.

د هوکړه‌لیک د لاسلیک پر مهال، د لوړو زده کړو وزارت علمي مرستیال شیخ ضیاءالرحمن مدني د یاد هوکړه‌لیک پر ارزښت او ګټو خبرې وکړې او ویې ویل، چې دغه هوکړه‌لیک به دواړو ادارو ته په علمي، عملي، تخنیکي او تدریسي برخو کې د همکاریو پراخې زمینې او اسانتیاوې برابرې کړي.

همدارنګه د مالیې وزارت اداري مرستیال شیخ دوست محمد مخلص، د لوړو زده‌کړو وزارت د علمي او اداري فعالیتونو او په ځانګړې توګه د یاد وزارت له رهبري پلاوي څخه د غوره خدمتونو له امله مننه او ستاینه کړې او ویلي یې دي، چې دغه هوکړه‌لیک د دواړو وزارتونو او د ټول ولس په ګټه دی.

نوموړي ټینګار کړی، چې د دې هوکړه‌لیک پر اساس به وړ، مسلکي او ژمن کادرونه ادارو ته جذب شي، چې دین، ټولنې او اسلامي ارزښتونو ته په صداقت او اخلاص خدمت وکړي.

لوړه زده‌کړو وزارت د یاد هوکړه‌لیک موخه استادانو او متخصصینو ته د انفرادي او ګډو علمي ـ څېړنیزو فعالیتونو د فرصتونو برابرول، د مالیې وزارت اړوند منسوبینو لپاره د تحصیلي سویې او ظرفیت لوړونې زمینه برابرول، محصلینو ته د عملي زده‌کړو اسانتیاوې رامنځته کول، استادانو ته د څېړنیزو فعالیتونو زمینه برابرول او د دواړو لوریو ترمنځ د تخنیکي پوهې او مسلکي مهارتونو تبادله او همغږۍ پیاوړتیا ښودلې ده.

همدارنګه د دې هوکړه‌لیک پر اساس، دواړه خواوې به د خپلو تخنیکي او انساني امکاناتو له مخې، په تحصیلي، ښوونیزو، څېړنیزو، ظرفیت لوړونې او تخنیکي برخو کې، په مرکز او ولایتونو کې له یو بل سره ګډې همکارۍ ترسره کوي.

د امریکا ولسمشر ډونالډ ټرمپ رویټرز خبري اژانس ته ویلي، چې روسیه نه؛ بلکې اوکراین د سولې د هوکړې په وړاندې خنډ دی.

ټرمپ له رویټرز خبري اژانس سره په یوه ځانګړې مرکه کې ویلي، چې د روسیې ولسمشر ولادیمیر پوتین چمتو دی چې په اوکراین کې خپلې څلور کلنې جګړې ته د پای ټکی کېږدي؛ مګر زېلنسکي د دې هوکړې پر وړاندې خنډ دی.

ټرمپ د پوتین په اړه ویلي: «فکر کوم چې هغه هوکړې ته چمتو دی؛ مګر اوکراین هوکړې ته لږ چمتووالی لري.»

د عامې روغتیا وزیر مولوي نورجلال جلالي افغانستان لپاره د ماشومانو خوندیتوب (Save the children) موسسې له نوي رییس سره د مور او ماشوم د روغتیايي خدمتونو ښه والي په موخه لیدنه کړې ده.

عامې روغتیا وزارت وايي، په دې لیدنه کې د یادې موسسې د پخواني رییس د کارونو د ستاینې ترڅنګ د روغتیايي خدمتونو د پراختیا او لا ډېرو همکاریو په اړه خبرې کړي.

ورته مهال، د ماشومانو خوندیتوب موسسې ژمنه کړې چې په افغانستان کې د مور او ماشوم روغتیايي خدمتونو ته پراختیا ورکوي، روغتیايي مرکزونه زیاتوي، او د ماشوم روغتیا اړوند پروژې زیاتوي.

کریملین ویلي، چې د روسیې ولسمشر ولادیمیر پوتین نن (پنجشنبه، د مرغومي ۲۵مه) د یو شمېر هېوادونو د سفیرانو باورلیکونه ترلاسه کوي.

د خبرپاڼې له مخې، په دې لیست کې په مسکو کې د اسلامي امارت سفیر مولوي ګل حسن حسن هم شامل دی، چې خپل باورلیک د روسیې ولسمشر ته وړاندې کوي.

د اروپا پارلمان د امریکا ولسمشر ډونالډ ټرمپ له لوري د ګرینلنډ د لاسته راوړلو تهدیدونو په غبرګون کې، د اروپايي ټولنې او متحده ایالاتو ترمنځ د سوداګریز تړون د ځنډولو په اړه خبرې کوي.

رویټرز خبري اژانس راپور ورکړی، چې د اروپا پارلمان د هغو قانوني وړاندیزونو په اړه خبرې کوي چې د اروپا ټولنې له لوري د امریکايي توکو پر واردولو زیات شمېر تعرفې له منځه یوسي، هغه څه چې له امریکا سره د سوداګریز تړون اصلي برخه ده.

د راپور پر اساس، ټاکل شوې وه چې د اروپا پارلمان خپل دریځ د روان زېږدیز کال ۲۶ او ۲۷مو ورځو کې د رایې اخیستنې له مخې معلوم کړي، خو استازو وویل چې دغه رایه اخیستنه باید د اوس لپاره وځنډېږي

د اروپايي ټولنې ساینس پوهانو اعلان کړی، چې ۲۰۲۵ میلادي کال د ځمکې د کرې په تاریخ کې درېیم تود کال ثبت شوی دی.

رویټرز خبري اژانس د هوا پيژندنې اروپايي مرکز په حواله خبر ورکړی، چې وروستي درې کلونه په تاریخ کې تر ټولو ګرم کلونه ثبت شوي دي.

د راپور پر بنسټ، ساینس پوهانو خبردارې ورکړی، که دا حالت داوم وکړي؛ د نړۍ اقلیم، چاپېریال او د انسان ژوند له سختو ننګونو سره مخ کولای شي.