رویټرز خبري اژانس راپور ورکړی چې د مکسیکو په سویلي ایالت اواخاکا کې د یوه اورګاډي د چپه کېدو له امله ۱۳ تنو ژوند بایللی او ۹۸ تنه نور ټپیان شوي دي.
د راپور له مخې په دغه اورګاډي کې ۲۵۰ تنه سپاره و، چې له دې ډلې ۱۳۹ تنه روغ رمټ پاتې شوې دي.
ټرمپ او پوتین د اوکراین بحران د حل په اړه ټلیفوني خبرې کړي
د روسیې ولسمشر ولادیمیر پوتین او د امریکا ولسمشر ډونالډ ټرمپ د روان زېږدیز کال په نهمه ټلیفوني اړیکه کې د اوکراین بحران او د دغه بحران د پای ته رسولو د حللارو په اړه خبرې کړي.
رویټرز خبري اژانس د روسیې ولسمشر سلاکار یوري اوشاکوف له قوله ویلي، په دې اړیکه کې دواړو لوریو د اوکراین بحران د پای ته رسولو بهیر د څارنې لپاره په اقتصادي او امنیتي برخو کې د دوه ګډو کاري ډلو جوړولو باندې هوکړه کړې ده.
د راپور له مخې، د دواړو هېوادونو مشرانو د اوکراین او اروپا د لنډمهاله اوربند د طرحې مخالفت کړی او د کییف پر قاطع سیاسي پرېکړه یې ټینګار کړی دی.
د دې خبرو اترو د بحث یوه موضوع د جګړې له پای ته رسیدو وروسته د مسکو او واشنګټن ترمنځ د اقتصادي همکارۍ د امکاناتو ارزونه هم وه.
مولوي امیر خان متقي: د اسلامي امارت او امریکا تعامل نوي پړاو ته داخل شوی
د بهرنیو چارو وزیر مولوي امیر خان متقي سره د افغانستان لپاره د امریکا پخواني ځانګړي استازي زلمي خلیلزاد لیدنه کړې.
بهرنیو چارو وزارت وايي، چې دې لیدنه کې د افغانستان او متحده ایالتونو د دوو اړخیزو اړیکو د پراختیا پر لارو چارو، فرصتونو او ستونزو هر اړخیزې خبرې شوې دي.
دې لیدنه کې مولوي امیرخان متقي ویلي، چې له افغانستان څخه د بهرنیو ځواکونو له وتلو او جګړې له پای وروسته، د اسلامي امارت او امریکا تعامل عملا نوي پړاو ته داخل شوی دی.
نوموړي زیاته کړې، په ګڼو برخو کې د دواړو هېوادونو ترمنځ د اړیکو د پراختیا فرصتونه شته، چې د دوامداره خبرو له لارې پرې کار کېدلای شي.
دغه راز ښاغلي خلیلزاد په افغانستان کې ډاډمن امنیت او د بیارغونې په برخه کې پرمختګونه ستایلي او د دوه اړخیزو ناستو په دوام یې ټینګار کړی دی.
د ایران او سعودي عربستان د بهرنیو چارو وزیرانو ټلیفوني خبرې کړي
د ایران د بهرنیو چارو وزیر سید عباس عراقچي او د سعودي عربستان د بهرنیو چارو وزیر فیصل بن فرحان په یوه ټلیفوني اړیکه کې د دوه اړخیزو اړیکو او د سیمهییزو او نړیوالو بدلونونو په تړاو خبرې کړې دي.
د ایران د بهرنیو چارو وزارت وايي، ښاغلي عراقچي په دې ټلیفوڼي اړیکه کې په لبنان کې د اسرائیلي رژیم د تېریو د بندولو لپاره د نړیوالې ټولنې پر مسولیت ټینګار کړی دی.
ورته مهال، د سعودي عربستان د بهرنیو چارو وزیر د سیمې هېوادونو له لوري د سولې او ثبات د ساتنې لپاره د همکارۍ د اهمیت پر دوام سربېره د اسرائیلي رژیم د حساب ورکولو پر اړتیا ټینګار کړی دی.
د هند له لوري عامې روغتیا وزارت ته شپږ مجهز امبولانسونه وسپارل شول
د عامې روغتیا وزارت مسولین وایي، تېره ورځ د هند له لوري شپږ مجهز امبولانسونه په رسمي ډول دې وزارت ته وسپارل شول.
یاد وزارت زیاته کړې، دغه امبولانسونه په عصري طبي وسایلو سمبال دي او د بېړنیو ناروغانو د لېږد او عاجلو روغتیايي خدمتونو په برخه کې به مهم او اغېزمن رول ولوبوي.
دغهراز د عامې روغتیا وزارت مشرتابه د دغو امبولانسونو د مرستې له امله د هند حکومت څخه مننه کړې او دا یې د دواړو هېوادونو ترمنځ د روغتیايي همکاریو د پیاوړتیا یو مهم ګام بللی دی.
د کډوالو ستونزو ته د رسېدنې عالي کمېسیون دارالانشا د کمېټو ورځنی کاري راپور
د شنبې ورځ، د ۱۴۴۷/۷/۶هـ قـ نېټه چې ۱۴۰۴/۱۰/۶هـ ل نېټې سره، سمون خوري.
د هېواد له بېلابېلو لارو څخه افغان کډوال راستانه شوي او په بېلابېلو برخو کې ورته اړین خدمتونه وړاندې شوي.
بشپړ راپور یې په لاندې ډول وړاندې کیږي:
نیمروز
ورېښمو لار
د تثبیت، ثبت او استقبال کمېټه:
د نیمروز ولایت د ورېښمو له لارې ۵کورنۍ چې د غړو شمېر یې ۲۵تنه و، هېواد ته راستنې او ثبت شوي دي او همدا راز ۷۴۴مسافر هېواد ته راستانه شوي دي.
د مالي چارو د تنظیم کمېټه:
د مالي چارو د تنظیم کمېټې له لوري له درېیو کورنیو سره ټولې۲۸ زره افغانۍ مرسته شوې ده.
د خدماتو او روغتیايي چارو کمېټه:
د نیمروز د ورېښمو په لار کې راستنه شویو کډوالو ته د روغتیا په شمول لاندې بیلابیل خدمات وړاندې شوي:
روغتیا: په ورېښمو لار کې ۳۵۸تنه راستانه شوي کډوال تداوي شوي دي.
مخابرات: راستنو شویو کډوالو ته درې عدده سیمکارتونه، په وړیا توګه چې وړیا دقیقې او انټرنېټي بستې هم پکې فعاله وې، وېشل شوي دي.
د اطلاعاتو او عامه پوهاوي کمېټه:
د نیمروز ولایت د ورېښمو په لار کې کډوالو ته عامه پوهاوی ورکړل شوی. یادو کډوالو ته د دوی د ثبت، لیږد، مالي مرستو، لنډ مهاله مېشتېدنې او همدرانګه د هېواد، اسلامي نظام، کډوالۍ، صبر او زغم، ښوونې او روزنې په اړه ګټور پوهاوی ورکړل شوی.
کنــــــــــــــدهار
سپین بولدک ډیورنډ فرضي کرښه
د ثبت، تثبیت او استقبال کمېټه:
د سپین بولدک له لارې ۷۷کورنۍ چې د غړو شمېر یې ۴۰۴تنه و، هېواد ته راستنې او ثبت شوي دي.
د ټرانسپورټ او لېږد کمېټه:
له سپین بولدک څخه ۵۳کورنۍ چې د غړو شمېر یې ۲۸۳تنه و، کندهار، هرات، زابل، غزني، خوست او کابل ته په خوندي توګه لېږدول شوي دي او یادو کورنیو ته ۴۱۲ زره افغانۍ کرایه هم ورکړل شوې ده.
د مالي چارو د تنظیم کمېټه:
د مالي چارو د تنظیم کمېټې له لوري له ۷۷کورنیو سره ټولې۶۳۰ زره افغانۍ مرسته شوې ده.
د خدماتو او روغتیايي چارو کمېټه:
په سپین بولدک کې راستنېدونکو کډوالو ته د روغتیا په شمول لاندې بېلابېل خدمات وړاندې شوي:
خواړه: په سپین بولدک کې ۷۷۷خوراکه ډوډۍ او اوبه وېشل شوي دي.
مخابرات: راستنو شویو کډوالو ته ۹۸عدده سیمکارتونه، په وړیا توګه چې وړیا دقیقې او انټرنېټي بستې هم پکې فعاله وې، وېشل شوي دي.
ننـــــــــګرهــــــار
تورخم ډیورنډ فرضي کرښه
د ثبت، تثبیت او استقبال کمېټه:
د تورخم له لارې ۵۵۶کورنۍ هېواد ته راستنې او یادو کورنیو ۳۱۲۴تنه غړي، ثبت او بایمیټریک شوي دي.
د ټرانسپورټ او لېږد کمېټه:
له تورخم څخه ۳۸۴کورنۍ چې د غړو شمېر یې دوه ۱۸۲تنه و، ننګرهار، کونړ، لغمان او کابل ته په خوندي توګه لېږدول شوې دي او یادو کورنیو ته یو میلیون،۸۶۸ زره او۲۰۰افغانۍ کرایه هم ورکړل شوې ده.
د مالي چارو د تنظیم کمېټه:
د مالي چارو د تنظیم کمېټې له لوري له ۴۴۰کورنیو سره ټولې درې میلیونه او ۶۷۶ زره افغانۍ مرسته شوې ده.
د خدماتو او روغتیايي چارو کمېټه:
د تورخم په عمري کمپ کې راستنېدونکو کډوالو ته د روغتیا په شمول لاندې بېلابېل خدمات وړاندې شوي:
مخابرات: راستنو شویو کډوالو ته ۶۴۶عدده سیمکارتونه، په وړیا توګه چې وړیا دقیقې او انټرنېټي بستې هم پکې فعاله وې، وېشل شوي دي.
د اطلاعاتو او عامه پوهاوي کمېټه:
په تورخم کې کډوالو ته عامه پوهاوی ورکړل شوی. یادو کډوالو ته د دوی د ثبت، لیږد، مالي مرستو، لنډ مهاله مېشتېدنې او همدرانګه د هېواد، اسلامي نظام، کډوالۍ، صبر او زغم، ښوونې او روزنې په اړه ګټور پوهاوی ورکړل شوی.
هلمند
بهرامچه ډیورنډ فرضي کرښه
د تثبیت، ثبت او استقبال کمېټه:
د بهرامچې له لارې ۳۰کورنۍ چې د غړو شمېر یې ۱۷۰تنه و، هېواد ته راستنې او ثبت شوي دي.
د ټرانسپورټ او لېږد کمېټه:
د هلمند له بهرامچې څخه ۲۳کورنۍ چې د غړو شمېر یې ۱۰۱تنه و، لښکرګاه او ګرمسیر ته په خوندي توګه لېږدول شوې دي او یادې کورنۍ ته ۵۰ زره او ۵۰۰افغانۍ کرایه هم ورکړل شوې ده.
د مالي چارو د تنظیم کمېټه:
د مالي چارو د تنظیم کمېټې له لوري له ۱۱کورنیو سره ټولې۸۲ زره افغانۍ مرسته شوې ده.
کابل
مرکز
د ټرانسپورټ او لیږد کمېټه:
له کابل څخه ۲۳۴ کورنۍ چې د غړو شمېر یې ۱۷۴۴تنه و، مختلفو ولایتونو ته په خوندي توګه لېږدول شوې دي او یادو کورنیو ته یو میلیونه، ۳۷ زره او ۹۰۰افغانۍ کرایه هم ورکړل شوې ده.
د ټولو کمېټو د بېلا بېلو کړنو ټولیز ارقام په لاندې توګه دي:
ثبت شـــــوي کډوال: ۶۶۸کورنۍ او ۲۵۵۳وګړي
لېږدول شـوي کډوال: ۶۹۴کورنۍ او ۴۳۱۰وګړي
مرسته شوي کډوال: ۵۳۱کــورنۍ
وېشل شوي سیمکارتونه: ۷۴۷عــــدده