د نشه‌يي توکو پر وړاندې د مبارزې مرستیال او ورسره مل پلاوي قطر کې له یو شمېر لوړپوړو چارواکو سره لیدنې کړې دي.

د کورنیو چارو وزارت د نشه‌يي توکو پر وړاندې د مبارزې مرستیال لوی پاسوال ملا عبدالحق اخوند همکار په مشرۍ پلاوي، چې څو ورځې وړاندې قطر ته د رسمي بلنې په ترڅ کې سفر کړی و، د سفر په لړ کې د یاد هېواد د کورنیو چارو وزارت د نشه‌يي توکو پر وړاندې د مبارزې عمومي ادارې له مشر طارد علی، د پولیسو عمومي اکاډمۍ له مرستیال فهد سعید او د یادو عمومي ادارو یو شمیر نورو مسولینو سره لیدنه کړې.

لیدنه کې د نشه‌يي توکو پر وړاندې د مبارزې مرستیال د قطر د کورنیو چارو وزارت د نشه‌يي توکو پر وړاندې د مبارزې عمومي ادارې له مشر سره د نشه‌يي توکو پر وړاندې د مبارزې، کنټرول او مخنیوي ترڅنګ د روږدو کسانو د درملنې، ملاتړ او نورو اړوندو مسایلو په اړه خبرې کړې دي.

دواړو لوریو د دې شومې پدیدې د مخنیوي او کنټرول لپاره د لا زیاتو همکاریو او ګډو هڅو ترڅنګ، د پولیسو د عمومي ادارې له خوا هم تللي پلاوي ته د پولیسو د مسلکي روزنې په برخه کې د همکارۍ ډاډ ورکړل شوی دی.

هېره دې نه وي، چې په دې لیدنه کې په قطر کې د افغانستان اسلامي امارت سفیر سهیل شاهین هم ګډون درلود.

د هند پوځ وايي، چې تر کنټرول لاندې کشمیر کې یې د پاکستاني پوځ په ډزو کې لږ تر لږه ۱۵ کسان وژل شوي.

د راپورونو له مخې، د پاکستان پوځ پرون چهارشنبه د هند تر کنټرول لاندې کشمیر کې په ګڼو سیمو بریدونه کړي.

له دې وړاندې هند د چهارشنبې په شپه په پاکستان کې پر بېلابېلو سیمو بریدونه وکړل.

د هند حکومت اعلان وکړ، چې په پاکستان کې یې ۹ ځایونه په نښه کړي، خو پاکستان وروسته په شپږو ځایونو بریدونه تایید کړل.

د پاکستان د پوځ له قوله، د هند په بریدونو کې د مړو شمېر ۳۱ او د ټپيانو بیا ۵۷ ته لوړ شوی.

د پاکستان دفاع وزیر خواجه اصف له پاکستاني رسنیو سره په خبرو کې ویلي، چې لا هم د هند له لوري د برید ګواښ شته.

نوموړي زیاته کړې، چې په ځینې ښارونو کې ځکه څراغونه مړه شول، تر څو بریدونه ونه شي.

خواجه اصف په ځواب ورکولو ټینګار کړی او ویلي یې دي، هند چې څه کوي موږ یې نه زغمو.

تازه په لاهور کې ځایي امنیتي سرچینو ادعا کړې، چې یوه هندي ډرون الوتکه یې غورځولې ده. له دې مخکې په دې ښار کې د یوې درنې چاودنې خبر هم ورکړل شوی و.

رویټرز وايي، چې د پاکستان په درېیو هوايي ډګرونو -کراچۍ، لاهور او سیالکوټ- کې الوتنې ځنډول شوې دي.

د افغانستان اسلامي امارت په شمول د نړۍ ګڼو مشرانو له دواړو لوریو د زغم غوښتنه کړې ده.

اسلامي امارت د یوې اعلامیې په خپرولو سره ویلي، چې امنيت او ثبات د ټولې سیمې په ګټه دی او په دواړو لوریو یې غږ کړی، چې له زغم څخه کار واخلي او ستونزې د ډيپلوماسۍ له لارې په خبرو او تفاهم حل کړي.

د هند تر کنټرول لاندې کشمیر کې له برید وروسته، چې ۲۶ کسان پکې ووژل شول، د هند او پاکستان تر منځ تاوتریخوالی زیات شوی دی.

د افغانستان اسلامي امارت د رياست الوزرا اداري مرستيال مولوي عبدالسلام حنفي پکتیکا ولايت کې راستنو شويو کډوالو لپاره د استوګنې نوی ښارګوټی پرانيست.

په دې اړه جوړو شویو مراسمو کې د کور او ښار جوړولو وزیر مولوي حمدالله نعماني، د پکتیکا مرستيال والي، علماوو، مشرانو او يو شمېر ځايي مسولین شتون درلود.

مولوي عبدالسلام حنفي ویلي؛ د اشغالګرو لخوا د هېواد د اشغال پر مهال ډېری افغانانو له دين څخه د دفاع او د ځان او مال ساتنې په موخه بېلابېلو هېوادونو ته کډوال شول او اوسمهال زموږ دغه هېوادوال په زور د ګاونډيو او نورو هېوادونو لخوا ایستل کيږي، خو د کډوالو ستونزو ته د رسېدنې عالي کمېسيون له لوري ورته د خوراکي توکو، اوبو، مېشتېدنې، روغتيايي، تعليمي او ترانسپورټي اسانتیاوې برابريږي.

نوموړي د ګاونډيو او نورو هېوادونو لخوا په غير اصولي ډول د افغان کډوالو د ایستلو پروسې په تړاو زیاته کړې، د اسلامي امارت رهبري او مسولين په ټولو امکاناتو هڅه کوي، ترڅو په زور ایستل کېدونکو افغان کډوالو ته غوره خدمتونه وړاندې شي، چې هغوی وتوانېږي په خوښۍ او ارامۍ په کور دننه ابرومندانه ژوند ولري.

د يادونې وړ ده، چې په ۳.۵ زره جريبه ځمکه دغه ښارګوټی د استوګنې یو زر او ۶۵۲ نومرې لري او د ټولو امکاناتو په لرلو سره د پکتيکا ولايت په مرکز ښرنه کې جوړېږي.

همداراز هغو کډوالو ته چې د راستنېدونکو کډوالو ستونزو ته د رسېدنې عالي کمېسيون لخوا به مستحق وپېژندل شي، د يوې شفافې پروسې له لارې ووېشل شي.

د بهرنیو چارو وزیر مولوي‌ امیر خان متقي او د ترکمنستان د وزیرانو شورا مرستیال او د بهرنیو چارو وزیر رشید مردوف د ویډیو کنفرانس له لارې خبرې کړې دي.

په دې ویډیو کنفرانس کې د افغانستان او ترکمنستان په سیاسي او اقتصادي اړیکو، د دیپلوماتیکو اړيکو د کچې پر لوړولو او د دواړو هېوادونو ترمنځ د لویو پروژو، په ځانګړې توګه د افغانستان په خاوره کې د ټاپي نل‌ليکې د چارو په اړه هر اړخیزې خبرې شوې دي.

د هېواد د بهرنيو چارو وزير د دواړو هېوادونو دوه اړخيزې اړيکې تر بل هر وخت پياوړې او د لا زیاتو همکاریو او پرمختګونو لپاره یې شرایط برابر بللي دي.

مولوي امير خان متقي يو ځل بيا د ګډو سترو اقتصادي پروژو د پلي کېدو په برخه کې د افغانستان د حکومت ژمنتيا په ډاګه کړې.

رشید مردوف د ټاپي پروژې روانې چارې مثبتې ارزولې دي او په نږدې راتلونکي‌ کې یې د ریل پټلۍ، سوداګرۍ او ټرانزيټ په برخو کې د عملي همکاریو د پراختیا خبر ورکړی دی.

د ترکمنستان د بهرنيو چارو وزير همداراز ژمنه کړې، چې هېواد به يې په لنډه موده کې افغان سوداګرو ته د ویزو په ورکړه کي نورې اسانتياوې هم راولي.

دواړو لوريو هوکړه کړې، چې د ټاپي پروژې د چارو چټکتیا، د ریل پټلۍ پراختیا، برېښنا، ترانسپورټي اسانتیاوو رامنځته کولو او اقتصادي همکاریو د پراختیا په موخه به ناستو او مشورو ته دوام ورکوي.

د افغانستان اسلامي امارت د رياست الوزرا اداري مرستيال مولوي عبدالسلام حنفي د کور او ښار جوړولو وزارت وزیر مولوي حمدالله نعماني، د پکتیکا مرستیال والي مولوي مخدوم عبدالسلام سعادت، د غزني  ولایت علماوو، مخورو او یو شمېر سیمه ییزو مسولينو په شتون کې، د غزني ولایت د اندړو ولسوالۍ بازار تفصیلي پلان پرانیست.

د یادونې ده، چې د غزني ولایت د اندړو ولسوالۍ بازار تفصیلي پلان د ۲۰۰ جریبه ځمکې مساحت سره په پام کې نیول شوی دی.

د ریاست‌الوزرا اقتصادي مرستیال ملا عبدالغني برادر اخوند په مشرۍ د اقتصادي کمېسیون نوبتي غونډه وشوه.

دا غونډه پرون د روان ۱۴۰۴ لمریز کال د ثور میاشتې په ۱۷مه نېټه په مرمرینه ماڼۍ کې وشوه.

ناستې ته له اجنډا سره سم د کرنې، اوبولګولو او مالدارۍ وزارت له لوري په هرات، هلمند، ننګرهار او بلخ ولایتونو کې د شپږو کرنیزو، نمایشي او ترویجي کمپلکسونو جوړولو طرحه د بحث لپاره وړاندې شوه.

یاده طرحه له هر اړخیزې ارزونې وروسته د اقتصادي کمېسیون د سپارښتنو په پام کې نیولو سره تایید شوه. دغه کمپلکسونه په ۴۴۷۹ جریبه ځمکه کې جوړېږي او بزګرانو ته به د عصري او میکانیزه کرنې په برخه کې غوره خدمات وړاندې کوي.

دغه‌راز د کرنې، اوبولګولو او مالدارۍ وزارت اړوند د چرګانو سکټور د ځان بسیاینې پالیسي هم وړاندې شوه، چې له هر اړخیزې ارزونې وروسته تایید شوه.

افغانستان اوس‌مهال د چرګانو سکټور د غوښې او دانې د تولید په برخو کې ځان بسیاینې ته نږدې شوی، چې د دې پالیسۍ په تطبیق سره به د هګیو د تولید په برخه کې هم پر ځان بسیا شي.

اوس‌مهال د هېواد په کچه د چرګانو شاوخوا ۱۴ زره فارمونه فعال دي، چې سل زره کسان په مستقیم او ۳۰۰ زره په غیرې مستقیم ډول په کار پکې بوخت دي.

د اقتصادي کمېسیون دې نوبتي غونډې ته د کرنې، اوبولګولو او مالدارۍ وزارت اړوند د لبنیاتو سکټور د ځان بسیاینې پالیسي هم د بحث لپاره وړاندې شوه.

یاده پالیسي له هر اړخیزې ارزونې وروسته د اقتصادي کمېسیون د سپارښتنو په پام کې نیولو سره تایید شوه. د دې پالیسۍ په تطبیق سره به د هېواد د اړتیا وړ لبنیات په کور دننه تولید، پروسس او د مالدارۍ سکټور به وده وکړي.

په نباتي خوراکي غوړیو کې د ځان بسیاینې طرحه، چې د کرنې، اوبولګولو او مالدارۍ وزارت اړوند وه، هم وړاندې شوه. یاده طرحه له هراړخیز بحث وروسته د اقتصادي کمېسیون د سپارښتنو په پام کې نیولو سره تایید شوه.

د دې طرحې له مخې به په بېلابېلو ولایتونو کې پر شاوخوا ۲۸۹ زره هکټاره ځمکه د پنبې، سویابین، کونځلو، شړشم، زغرو او لمرګلي نباتات کرل کېږي، چې د طرحې د لومړۍ برخې په تطبیق سره به د نباتي خوراکي غوړیو په برخه کې د هېواد ۳۰ سلنه اړتیا پوره شي.

د غونډې په پای کې د یوشمېر موضوعاتو تعقیبي راپورونه هم وړاندې شول، چې د اقتصادي کمېسیون له لوري تایید شول.

یادې پرېکړې د منظورۍ په موخه د عالیقدر امیرالمؤمنین حفظه‌الله تعالی دفتر ته لېږل شوې دي.

د جوزجان ولایت د احصایې او معلوماتو ریاست د برېښنايي پیژندپاڼو وېش بهیر کې د اسانتیا په موخه د برېښنايي پیژندپاڼو دویمه وېش څانګه چې په شبرغان ښار کې فعاله وه، د اقچې ولسوالۍ ته ولېږدول شوه او د یو لړ رسمي مراسمو په ترڅ کې یې فعالیت پیل کړ.

په په دې تړاو جوړو شویو مراسمو کې د دې ولایت د احصایې او معلوماتو رییس عزیزالله عزام، د اقچې ولسوالۍ مسولینو، علماوو، سپین ږیرو او د یاد مرکز کارکوونکو ګډون کړی و.

عزیزالله عزام وايي؛ د دې وېش څانګې په فعالیت سره، نه یوازې د اقچې ولسونو ته د برېښنايي پیژندپاڼو په ترلاسه کولو کې لازمې اسانتیاوې رامنځته کېږي، بلکې د (مردیان، فیض اباد، خم‌اب، منګجیک، قرقین او خانقاه) ولسوالیو اوسېدونکي به هم وکولی شي په اسانۍ خپلې برېښنايي پیژندپاڼې ترلاسه کړي.

د غونډې پر دوام، د اقچې او شاوخوا شپږو ولسوالیو مسولینو د احصایې او معلوماتو ملي ادارې په ځانګړي ډول د یاد ولایت د احصایې او معلوماتو ریاست څخه مننه وکړه، د یادې وېش څانګې فعالېدل یې مهم ګام وګاڼه او د هر ډول مرستې ژمنه یې وکړه.

د یادولو وړ ده، چې د احصایې او معلوماتو ملي ادارې د هېواد په کچه د برېښنايي پیژندپاڼو د وېش لړۍ لرې پرتو سیمو او ولسوالیو ته غځولې ده، ترڅو د یادو سیمو اوسېدونکي په اسانۍ سره وکولی شي خپلې برېښنايي پیژندپاڼې ترلاسه کړي.

د کور او ښار جوړولو وزارت د مسکن، ودانیزو چارو او د پروګرامونو پراختیا مرستیال محمد اسماعیل فایز له چینایي پانګوالو سره لیدنه کړې.

په دې لیدنه کې چینایي پانګوالو ویلي، غواړو چې په افغانستان کې د مسکن په برخه کې پانګونه وکړو.

دوی همداراز هیله څرګنده کړې، چې د کور او ښار جوړولو وزارت مسولین به په دې برخه کې همکاري وکړي.

یادو پانګوالو زیاته کړې، که چیرې د کورونو جوړولو لپاره ځمکه وپیژندل شي، چمتو یو چې د ۱۰۰ میلیون ډالرو په ارزښت پانګونه وکړو.

د مسکن، ودانیزو چارو او د پروګرامونو پراختیا مرستیال ویلي، افغانستان په بېلابېلو برخو کې بهرنۍ او کورنۍ پانګونې ته اړتیا لري او دا اړتیا د مسکن په برخه کې تر ټولو زیاته د پام وړ ده.

نوموړي د هر راز همکارۍ ډاډ ورکړی او زیاته کړې یې ده، چې په اړوندو برخو کې به ورته اړینې اسانتیاوې برابرې کړي.

په پای کې د چارو د لا پرمختګ لپاره د ورته غونډو پر دوام ټینګار شوی.