د ریاستالوزرا اداري مرستیال مولوي عبدالسلام حنفي پروان ولایت ته د سفر په ترڅ کې د یاد ولایت له والي مفتي محمد ادریس انوري سره کتلي.
ښاغلي حنفي په دې کتنه کې د پروان د والي وړانديزونه اوريدلي او ژمنه یې کړې چې د دې ولایت اړتياوو ته به رسېدنه وشي.
ښاغلي حنفي د دې سفر په ترڅ کې له جبلالسراج تاریخي ماڼۍ، د چاریکار ښار له ګلغونډۍ تپې او د توپدرې له استوپې څخه هم ليدنه کړې ده.
د افغانستان د اسلامي امارت د کورنیو چارو وزارت رهبري او امنيتي ځواکونو خپلو خلکو ته پوره ډاډ ورکړ، چې د پولیسو ځواکونه به ستاسو امنیت په بشپړه توګه خوندي کړي، او موږ دا ژمنه پوره کړه، د هېواد په ګوډ ګوډ کې د اختر په درې ورځو کې ټول امنيتي ځواکونه ستاسو په چوپړ کې قرار درلود، ترڅو ښه امنيتي خدمات وړاندې شي چې الحمدالله؛ د عمل په ډګر کې ثابته شوه او امنيت په بشپړه توګه تامين شو.
د کورنیو چارو وزارت ویاند مفتي عبدالمتین قانع وايي، چې په راتلونکي کې به هم د ښه امنیت د تامين په موخه د پوليسو ځواکونه تل د هېوادوالو په خدمت کې وي.
ښاغلي قانع زیاته کړې؛ د خوښۍ ځای دی، چې زموږ خلکو د هېواد په ټولو ولایتونو کې د اختر درې ورځې د خپلو کورنیو، عزیزانو او ملګرو سره د بشپړې سولې او ارامۍ په فضا کې ولمانځلې، او له بې ساري امنيت څخه یې ډیره او پوره ګټه پورته کړه.
امنیت د خدای (ج) له لوري یو لوی نعمت دی، چې له نېکه مرغه، زموږ ملت په بشپړه توګه له دې نعمت څخه برخمن دی، او نن ورځ دوی کولی شي په ټول هېواد کې پرته له کومې ویرې سفر وکړي. موږ د خلکو د امنیت په تامین کې د امنیتي ځواکونو، په ځانګړي توګه د خپلو پولیسو ځواکونو د خولې، بې خوبۍ او هڅو څخه ځانګړې مننه کوو.
د کډوالو او بېرته راستنېدونکو چارو وزیر مولوي عبدالکبیر د کوچني اختر په دویمه ورځ له ګڼو امارتي مسولینو، قومي مشرانو او ځوانانو سره لیدنه وکړه.
په دې ناسته کې راغلو مېلمنو مولوي عبدالکبیر ته د کوچني اختر مبارکي ویلې او د اسلامي امارت له مسولینو یې مننه کړې، چې د هېواد د پرمختګ او د هېوادوالو د سوکالۍ لپاره هلېځلې کوي.
هغوی ویلي، چې د اسلامي امارت په راتګ سره په هېواد کې امنیتي وضعیت د ډاډ وړ دی او اقتصادي وضعیت ته یې په کتو په هېواد کې پر ګڼو اقتصادي پروژو کار پیل کړي دي.
یادو مېلمنو زیاته کړې، دا چې افغانان د روان کوچني اختر خوشحالۍ په ډاډه زړه سره نمانځي، دا د امنیت او ثبات برکت دی.
د کډوالو او بېرته راستنېدونکو چارو وزیر راغلو مېلمنو ته د اختر مبارکۍ تر څنګ هغوی ته ښه راغلاست ویلی او د دوی راتګ یې ارزښتناک ګڼلی دی.
نوموړي زیاته کړې، چې د اسلامي امارت موخه د هېواد پرمختګ، د افغانانو سوکاله ژوند او د ټولو هېوادوالو هوساینه ده.
د کډوالو او بېرته راستنېدونکو چارو وزیر، مولوي عبدالکبیر، کابل کې د اختر لمانځه په مراسمو کې ویلي چې هېوادونه دې افغان کډوالو ته وخت ورکړي، ترڅو په خپله خوښه هېواد ته را ستانه شي.
په دې مراسمو کې د کډوالو او بېرته راستنېدونکو چارو وزیر، په ګډون د کابینې یو شمېر غړو، امارتي مسوولینو او په کابل کې مېشتو دیپلوماتانو هم ګډون کړی و.
مولوي عبدالکبیر وویل چې کوچنی اختر د مسلمانانو لپاره د خوښۍ، یووالی او ثواب ځانګړې ورځ ده.
هغه د افغان ولس د سولې، سوکالۍ او اقتصادي پیاوړتیا د دوام هیله څرګنده کړه او ټینګار یې وکړ چې د اسلامي امارت موخه دا ده چې هېواد د تلپاتې ثبات او پرمختګ لور ته بوځي.
نوموړي د مجاهدینو قربانۍ وستایلې او وویل چې د اسلامي نظام د بریا تر شا د شهیدانو وینې دي، نو ټول افغان ولس مسوولیت لري چې د هغوی ارمانونه پوره کړي.
نوموړي له ولس څخه وغوښتل چې د اختر په مبارکو ورځو کې د غریبانو او اړمنو کورنیو پوښتنه وکړي، له هغوی سره مرسته وکړي او خپله خوښۍ ورسره شریکې کړي.
د مولوي عبدالکبیر په وینا، اسلامي امارت د اقتصادي ودې او د پانګوالو د جذب لپاره اسانتیاوې برابرې کړې دي او د کانونو استخراج، د برېښنا بندونو، د لویو لارو جوړولو، د قوش تېپې کانال سترې پروژې پیل شوې دي. ډېر ژر به د افغانستان د رېل پټلۍ هم پراختیا ومومي چې د افغانستان اقتصادي پرمختګ ته به لاره هواره کړي، ترڅو کورني او بهرني پانګوال وکولی شي په افغانستان کې پانګونه وکړي.
د کډوالو چارو وزیر وویل چې اوس مهال په هېواد کې سراسري امنیت تامین دی، فساد له منځه تللی، نشهیي توکي منع شوي او صنعتي ښارګوټي فعال شوي دي.
همدا راز اسلامي امارت د سیمې له هېوادونو سره اقتصادي او سوداګریزو همکاریو ته ژمن دی او د سیمهییزو پروژو ملاتړ کوي.
نوموړي د فلسطین پر مظلوم ولس د یرغلګرو اسراییلي ځواکونو بریدونه وغندل او له نړیوالو یې وغوښتل چې د غزې د مسلمانانو ملاتړ وکړي.
مولوي عبدالکبیر په پای کې د افغانستان ټول غیور ولس ته د کوچني اختر مبارکي وویله او د هېواد د تلپاتې سولې، ثبات او سوکالۍ دعا یې وکړه.
د نېکمرغه کوچني اختر لمونځ نن سهار په ارګ کې د افغانستان اسلامي امارت د لوړپوړو چارواکو په ګډون ادا شو.
د کوچني اختر د لمانځه په دې مراسمو کې د افغانستان اسلامي امارت د ریاستالوزرا د اداري او اقتصادي مرستیالانو سربېره، د رییسالورزا د دفتر لوی رییس، د کابينې وزیرانو او د اسلامي امارت یو شمېر ملکي او نظامي چارواکو ګډون درلود.
د لمانځه له ادا کولو مخکې د عبدالرحمن جامع جومات امام او خطیب مفتي محمود ذاکري د قرآنکریم او نبوي احادیثو په رڼا کې د مبارکې روژې د فضیلتونو او برکاتو په اړه مفصلې خبرې وکړې او ټولو هېوادوالو، اسلامي امت په ځانګړي ډول د فلسطین مظلومو خلکو ته یې د نېکمرغه کوچني اختر مبارکي وویله.
وروسته د ریاستالوزرا اداري مرستیال مولوي عبدالسلام حنفي عالیقدر امیرالمؤمنین حفظ الله تعالی، رییسالوزرا، د کابینې غړو، والیانو، ټولو امنیتي منسوبینو او مجاهدینو، د شهیدانو کورنیو، شهید پروره ملت، اسلامي امت او د غزې مسلمانو خوېندو او وروڼو ته د زړه له کومي د نېکمرغه کوچني اختر مبارکي وویله.
او زیاته یې کړې:« یووالی او ورورګلوي چې د ملتونو د بریا راز دی الله تعالی دې زموږ ترمنځ قایم او دایم وګرځوي، ټول باید کوښښ وکړو چې خپل وطن په ګډه اباد کړو.»
نوموړي له ټولو هغو هېوادوالو چې له هېواده بهر ژوند کوي وغوښتل چې خپل هېواد ته راستانه شي، او په وینا یې چې افغانستان د ټولو ګډ کور دی او باید ټول یې په شریکه اباد کړو.
همدا راز یې زیاته کړې:« موږ د نړۍ له ټولو هېوادونو سره د متقابل درناوي پر بنسټ نېکې او حسنه اړیکې غواړو.»
ورته مهال، د ریاستالوزرا اقتصادي مرستیال ملا عبدالغني برادر اخوند ټولو مسلمانانو ته د نېکمرغه کوچني اختر د مبارکۍ ترڅنګ وویل، د خوښۍ ځای دی چې له څو کلونو جنګ او ناخوالو راوروسته د اسلامي امارت په حاکمیت سره د اختر ورځې د بشپړ امنیت او سولې په فضا کې لمانځو.
هغه وویل، ټول افغانان د هېواد په خوښۍ او پرمختګ کې سره شریک دي او باید خپل یووالی وساتي او د هېواد د پرمختګ او ابادۍ لپاره یوه بل ته لاس ورکړي.
د ریاستالوزرا اقتصادي مرستیال څرګنده کړې:« پردي هیڅکله زموږ وطن نه ابادوي، سکون او خوشحالۍ یواځې زموږ او ستاسې په خاوره کې ده، راځئ چې خپل هېواد ته په بشپړ صداقت خدمت وکړو.»
نوموړي د نړۍ هېوادونو غوښتي، چې د افغانستان اسلامي امارت سره رغنده اقتصادي او سیاسي تعاملاتو ته لار هواره کړي، اسلامي امارت د خپلې اقتصاد محوره پالیسۍ او متقابل درناوي په چوکاټ کې هر ډول مناسبو تعاملاتو او مناسباتو ته چمتو دی.
وروسته ملا عبدالواسع د نېکمرغه کوچني اختر په مناسبت د افغانستان اسلامي امارت د رییسالوزرا ملا محمد حسن اخوند د نېکمرغه کوچني اختر د مبارکۍ پیغام ولوست.
په دې پیغام کې د افغانستان مسلمان او مجاهد ولس او د نړۍ ټولو مسلمانانو ته د کوچني اختر د مبارکۍ ترڅنګ راغلي:« الله تعالی مو ټول عبادات، صیام او قیام، دعاګانې او حسنه اعمال په خپل دربار کې مقبول وګرځوه.»
رییسالوزرا د اختر په دې پیغام کې څرګنده کړې، اختر د مسلمانانو لپاره د صله رحمۍ، اخوت، شفقت او اتحاد پیغام لري.
به پیغام کې راغلي دي:« نو هیله ده په دغو ښو ورځو او شپو کې د صله رحمۍ او قرابت پاللو فریضه په ښه توګه پر ځای کړئ. حسد او خصومتونه له زړونو وباسئ، په اخلاص او مهربانۍ یو او بل ته د خیر او فلاح دعاګانې وکړئ.»
دغه راز رییسالوزرا په خپل پیغام کې د اسلامي امارت مسوولین، تاجران، پانګوال او هغه هېوادوال چې مالي وس او توان یې ښه دی وغوښتل چې د اختر په دغو مبارکو ورځو او شپو کې دې د بې وسه هېوادوالو، بې سرپرسته کورنیو او یتیمانو لاسنیوی وکړي او د اختر په خوښیو کې دې را شریک کړي.
په دې پیغام کې رییسالوزرا هېوادوالو ته ډاډ ورکړ، چې ان شاء الله روان کال به هم د تېر په څېر د لویو پروژو د تطبیق، په بېلابېلو برخو کې د پانګونو د جذب، د اوبو د تنظیم، د زراعت او د سوداګرۍ د ودې، زدهکړو او روغتیایي خدماتو د اسانتیاوو او هېوادوالو ته د کاري او هوسا ژوند زمینې برابرولو کال وي.
ملا محمد حسن اخوند په خپل پیغام کې له ګاونډیو هېوادونو وغوښتل چې افغان کډوالو په اجباري توګه ونه باسي، دغه راز یې ګاونډیو، د سیمې او نړۍ هېوادونو ته ډاډ ورکړ چې افغانستان د هیچا په کورنیو چارو کې نه یوازې مداخله نه کوي، بلکې له ټولو سره د اسلامي اساساتو او ملي منافعو په رڼا کې د متقابل درناوي په اساس تعامل او ښه روابط غواړو.
همداراز په پیغام کې راغلي، دوی دې زموږ حسن نیت درک کړي، د مشکلاتو جوړولو، محدودیتو، بندیزونو او فشارونو پرځای دې د تفاهم لاره اختیار او مثبت تعامل ته دې راوړاندې شي.
د افغانستان اسلامي امارت رییسالوزرا د خپل پیغام په پای کې د «فلسطین او غزې» پر محصورو مسلمانانو چې د بې رحمه صهیونستانو تر سخت ظلم او بمبار لاندې دي څرګنده کړې.
همدا راز پیغام کې لیکل شوی دی:« موږ د اسلامي اخوت او عقیدوي خپلوۍ په اساس د دوی هر درد او تکلیف احساسوو، دوی زموږ هېر نه دي او نه یې هېرولای شو، الله تعالی دې د دوی د نجات ذریعه برابره او ظالم اسراییلي یرغلګر دې د عاد، ثمود، فرعون او نورو جابرانو غوندې هلاک او تباه کړي.»
د دغو مراسمو په پای کې د افغانستانو علومو اکاډمۍ عمومي رییس شیخ فریدالدین محمود دافغانستان غیور ولس ته د اسلامي نظام تر سیوري لاندې د اتحاد، اتفاق، خیر او فلاح ترڅنګ د خوښۍ او نېکمرغۍ دعا وکړه.
د افغانستان اسلامي امارت ویاند مولوي ذبیحالله مجاهد وایي، د کندهار ولایت په مرکزي عیدګاه کې د کوچني اختر لمونځ د عالیقدر امیرالمؤمنین حفظهالله تعالی په امامت ادا شو.
د ښاغلي مجاهد په وینا، په دې اختر لمونځ کې زرګونو هېوادوالو ګډون کړی وو.
د اطلاعاتو او کلتور وزیر ملا خیرالله خیرخواه د ایران سفیر علیرضا بیکدلي سره وکتل.
د اطلاعاتو او کلتور وزارت وایي، په دې کتنه کې ښاغلي خیرخواه د افغانستان او ایران ترمنځ د ګډو کلتوري او تاریخي ارزښتونو یادونه کړې او کلتور یې د دواړو هېوادونو د اړیکو د پیاوړتیا لپاره مهم وبلل.
نوموړي د کلتوري نندارتونونو، لاسي صنایعو او ګرځندوی فعالیتونو پر تنظیمولو ټینګار وکړ، ترڅو د سیاحت صنعت ته وده ورکړل شي.
د ښاغلي خیرخواه په وینا، اوس د کلتوري تعاملاتو لپاره ښه فرصت برابر شوی دی.
ورته مهال، علیرضا بیکدلي افغانستان او ایران دوه تنې او یو روح بللی او ویلی یې دی چې د دواړو هېوادونو اړیکې پر کلتور ولاړې دي او باید لا ډېرې پیاوړې شي.
په پای کې دواړو لورو د اصیل کلتور د معرفي کولو او کلتوري همکاریو د پیاوړتیا ژمنه وکړې.
