د کرنې، اوبولګولو او مالدارۍ وزارت د کرنې او مالدارۍ مرستیال مولوی صدراعظم عثماني په افغانستان کې د ملګرو ملتونو د خوړو او کرنې ادارې له مشر ریچارډ ترانچارډ سره لیدنه کړې.
په دې غونډه کې د کرنې او مالدارۍ مرستیالۍ تخنیکي سلاکارانو او د ملګرو ملتونو د خوړو او کرنې ادارې مرستیال نجیب امیرزي هم شتون درلود.
په ياده ناسته کې د کرنیزو تخمونو، کیمیاوي سرو او د څارویو خوراکي توکو د وېش او د ريشخور د لبنياتو د کارخونو د فعالولو، په مناسب موسم کې د فعاليتونو پر پيل او د پروژو د پلي کېدو په برخه کې د همغږۍ په اړه خبرې شوي.
د کرنې او مالدارۍ مرستیال ویلي؛ غوره ده چې د پروژو چارې په شفاف ډول پلي کړو او د خلکو لپاره یې اغېزمنتیا زیاته شي، ترڅو خلک له بې وزلۍ څخه خلاصون ومومي.
نوموړي زیاته کړې؛ د پروژو له فعالیت څخه هم باید څارنه وشي، ترڅو وړاندیز شوي معیارونو سره سم کار وکړي، خلکو سره مرستې ووشي او ودانیزې چارې ترسره شي.
ټرینچارد په خپلو خبرو کې د دغې ادارې د فعالیتونو په اړه معلومات ورکړي او ویلي يي دي؛ راتلونکې اوونۍ به د ترکیې په استانبول ښار کې د مرستو د جلبولو په اړه یو کنفرانس جوړ شي او هڅه به وکړي، چې د افغانستان د کروندګرو او بزګرانو اړتیاوې ورسره شریکې کړي، ترڅو د مرستې زمینه برابره شي.