د افغانستان اسلامي امارت د ارشاد، حج او اوقافو وزارت له لوري د ټول هېواد په لویو نظامي مرکزونو کې د قران عظیم الشان د ترجمو او د تفسیر دورو د پیل په تړاو غونډه ترسره کړه، چې پکې د ارشاد، حج او اوقافو وزیر، د دې وزات مرستیالانو، د هېواد جیدو علمای کرامو، شیوخو، مفتیانو، د ملي دفاع، کورنیو چارو وزارتونو او د استخباراتو لوی ریاست استازو او د وزارت د مرکزي ریاستونو رئیسانو ګډون کړی وو.
د غونډې په پیل کې د جوماتونو عمومي رییس مولوي محمد اشرف حقاني د ټول هېواد په لویو نظامي مرکزونو کې د قران کریم د ترجمو او تفسیر دورو په تړاو ګډونوالو ته معلومات ورکړل.
نوموړي وویل؛ د ارشاد، حج او اوقافو وزارت په ابتکار او داسلامې امارت د مشرتابه له لارښونې سره سم به د قران کریم د ترجمو او تفسیر دورې د شعبان المعظم میاشتې له لومړۍ نېټې څخه پیل او د رمضان المبارک میاشتې تر (۲۵) مې نېټې پورې به د هېواد په لویو نظامي مرکزونو او دغه راز به په ملي راډیو تلویزیون کې په دواړو ملي ( پښتو او دري) ژبو نشـر شي.
ورپسې د ارشاد، حج او اوقافو وزیر شیخ نور محمد ثاقب د غونډې ګډونوالو ته د قران عظیم الشان د ترجمې او تفسیر په ارزښت عالمانه او هر اړخیزه وینا واوروله او ویې ویل؛ مونږ او تاسو په داسې یوه غونډه کې راټول یوو، چې د تېر په څیر به د هېواد په ټولو لویو نظامي مرکزونو کې د قران کریم ترجمې او د تفسیر دورې پیل کیږي، چې همدا نن د مرکز د دې غونډې ترڅنګ په (۳۴) ولایتونو کې د قران کریم د ترجمې او تفسیر دورو د پیل په تړاو غونډې ترسره کیږي .
همدارنګه ښاغلي ثاقب زیاته کړه؛ د ویاړ ځای ده چې د اسلامي امارت له راتګ سره سم په لویو نظامي مرکزونو کې پرلپسې د څلورم کال لپاره د اسلامي امارت د مشرتابه له لارښونې سره سم، د ارشاد، حج او اوقافو وزارت لخوا د قران کریم ترجمې او د تفسیر دورې پیل کېږي، چې لله الحمد هر کال پکې توسیع او زیادت راځې, سږ کال به په (۳۳۴) لویو نظامي مرکزونو کې دقران عظیم الشان ترجمې ترسره شي چې له دې جملي څخه (۴۱) مرکزونه په کابل کې او پاتې (۲۹۳) مرکزونه په ولایاتو کې دې .
ښاغلي ثاقب د خپلو خبرو په ترڅ کې شیوخو او علمای کرامو ته ځینې مهمې او اړینې سپارښتنې وکړې او یې ویل؛ د قران کریم ترجمه او تفسیر باید په خپل وخت ترسره شي، د ترجمې ګډونوالو او مجاهدینو ته دې حاضري لازمې وګرځول شي او مجاهدینو ته دې د ښو اخلاقو، اخلاص، صداقت او دیانت لارښوونې وشي.
په غونډه کې د کورنیو چارو وزارت مرستیال، د ملې دفاع وزارت او د استخباراتو لوی ریاست استازو او دغه راز رابلل شویو شیوخو په خپل وار سره کټوري خبرې وکړي او د ارشاد، حج او اواقافو وزارت د دې کار ستاینه یی وکړه او دا یې یو ستر خدمت وباله او ویې ویل؛ دوی به خپل ټول هغه امکانات او سهولیات چې په واک کې یې لري د ارشاد، حج او اوقافو وزارت لخوا رامعرفي شوو شیوخو ته برابر کړي.