د بهرنیو چارو وزیر مولوي امیرخان متقي د ریاض العلوم دیني مدرسې د تعلیمي کال پاي مراسمو کې د وینا پرمهال ویلي، اوسمهال هېواد کې بشپړ اسلامي نظام حاکم دی او افغانان دې له ډلو ټپلو جوړولو ډډه وکړي او د اسلامي نظام تر چتر لاندې دې ټول ورورولي وپالي.
نوموړي زیاته کړې، افغانان د څلورو لسیزو راهیسې د بهرنیو اشغالګرو او کورنیو لاسپوڅو په هڅو ندی پرېښودل شوی چې د امن ساه واخلي.
مولوي امیر خان متقي د خپلو خبرو پرمهال د هېواد ابادۍ او پرمختګ لپاره د دیني زده کړو ترڅنګ د عصري زده کړو په ترلاسه کولو ټینګار کړی او زیاته کړې یې ده، چې ټول باید د هېواد په جوړولو کې برخه واخلي.
دا په داسې حال کې ده، چې د اسلامي امارت زعیم عالیقدر امیرالمؤمنین حفظه الله کندهار پوهنتون کې یوې لویې غونډې ته ویلي چې اسلامي امارت د علم پرمختګ لپاره ټولې اسانتیاوې برابرې کړي دي او زیاته کړې یې ده چې مدرسه او پوهنتون نور سره یو دي او اسلامي امارت یې ملاتړ کوي.