د راپورونو له مخې، د پرتګال په لیسبون ښار کې د یوه مسافر وړونکي کېبلي اورګاډي د چپهکېدو له امله لږ تر لږه ۱۵ کسان وژل شوي او ۱۸ نور ټپيان دي.
یاد اورګاډی له پټلۍ څخه تر وتلو وروسته چپه شوی دی.
چارواکو د قربانیانو پېژندګلوي او ملت نه دي روښانه کړي، خو ویلي یې دي، چې ځینې وژل شوي بهرنیان دي.
د لیسبون ښاروال ویلي: “دا زموږ د ښار لپاره غمجنوونکې ورځ ده. لیسبون په ماتم کې دی. دا یوه تراژېدي او غمجنه پېښه ده.”
د پرتګال ولسمشر مارسلو ربلو دي سوسا خواخوږي څرګنده کړې او دا پېښه یې تراژیدي بللې ده. نوموړي له چارواکو غوښتي، چې ژر تر ژره دې د پېښې لامل معلوم کړي.
د پرتګال حکومت نن پنجشنبه د دې پېښې له امله ملي ماتم اعلان کړی دی.