د پانګونې بینالوزارتي کمېټې نوبتي غونډه تېره ورځ سه شنبه د روان ۱۴۰۴ لمریز کال د مرغومي میاشتې په ۲۸مه نېټه په مرمرینه ماڼۍ کې تر سره شوه.
غونډې ته د سرپل ولایت په ګوسفندي ولسوالۍ کې د ښاروالۍ پر ځمکه د شرعي عقد (استصناع) پر بنسټ د سوداګریز مارکېټ د جوړېدو طرحې په تړاو د ټاکل شوې کمېټې راپور وړاندې شو.د راپور له مخې، یاده طرحه د تایید وړ وبلل شوه. د دې طرحې له مخې به دغه سوداګریز مارکېټ دوه پوړونه او ۱۴۸ دوکانونه ولري.
همداراز دې غونډې ته د جوزجان ولایت د مرکز اړوند په درېیمه ناحیه کې د ښاروالۍ پر ځمکه د سوداګریز مارکېټ د جوړېدو طرحې په تړاو د ټاکل شوې کمېټې راپور وړاندې شو. د راپور له مخې، یاده طرحه د تایید وړ وبلل شوه. د دې طرحې پر اساس به دغه سوداګریز مارکېټ پنځه پوړونه او ۷۹ دوکانونه ولري.
همدارنګه په دې غونډه کې د سوداګریزو، دیني، ټولنیزو او امارتي اعلانونو د خپرولو په موخه پر ښاري ټکسي موټرو د سکرینونو لګولو طرحه هم د بحث لپاره وړاندې شوه.
له بحث وروسته ټاکل شوې کمېټې ته دنده وسپارل شوه، څو د دې طرحې ټول اړخونه په ښه ډول و ارزوي او خپل راپور په ټاکلې نېټه د پانګونې بینالوزارتي کمېټې ته وړاندې کړي.