د اوبو او انرژي وزارت د اوبو مرستیال مجیب الرحمن عمر اخندازده او مل پلاوي ترکیې ته د خپل سفر په ترڅ کې په انقره کې د هایدرو ډيزاین، بارسو، سوایش او بیتیک ترکي ودانیزو شرکتونو له مسولینو سره وکتل.
په دې لیدنه کې په افغانستان کې د پانګونې او د اوبو پروژو د پلي کولو په برخه کې د هغوی د کاري تجربو شریکولو په هکله بحث او خبرې شوې دي.
د هایدرو ډیزاین شرکت مسولینو او تخنیکي کارمندانو د خپلو کاري تجربو په هکله د اوبو مرستیال او مل پلاوي ته اړین معلومات ورکړي او ویلي یې دي، چې د اوبو په تنظیم او ډیزاین برخه کې یې یو شمېر پروژې په افغانستان او اروپایي هېوادونو کې پلي کړې دي.
یاد شرکت په افغانستان کې د کجکي بند تحلیلي او زمینداور کانال د ډیزاین سربېره ځينې نورې پروژې هم ډيزاین کړې دي.
همدارنګه د بارسو، سوایش او بیتیک شرکتونو مسولینو په افغانستان کې د پانګونې او د اوبو پروژو د پلي کولو په برخه کې خپلې کاري تجربې شریکې کړې دي.
د یادونې وړ ده، چې تر دې وړاندې ښاغلي مجیب الرحمن عمر او مل پلاوي ترکیې هېواد ته د خپل سفر په ترڅ کې د کجکي بند لپاره د جوړوېدونکو دروازو جوړولو له بهیر څخه د لیدنې ترڅنګ په انقره کې د افغانستان د اسلامي امارت له سفیر سره هم کتلي دي.
د دې تر څنګ یې په افغانستان کې د اوبو پروژو د تنظیم په برخه کې د ترکيې او نورو هېوادونو د پانګوالو لپاره د اسانتیاوو برابرولو په هکله هم خبرې اترې کړې دي.