د الجزيرې خبري شبکې ویلي، تېره شپه (یکشنبه) صهیونیستي یرغلګرو د غزې ښار الشفا روغتون ته نږدې د خبریالانو پر خیمه هوایي برید کړی، چې له کبله یې د دې شبکې پینځه تنه خبریالان شهیدان شوي.
د یادې شبکې د راپور له مخې، په قربانیانو کې د دوو خبریالانو په ګډون درې تنه انځور اخیستونکي شامل دي.
د الجزيرې اجرایيه مشر محمد معوض ويلي، چې په دې شهید شویو خبریالانو کې انس الشريف د رسمي خبريال په توګه ثبت شوی و او يوازينی غږ و چې نړۍ يې د غزې له حالاتو خبروله.
د الجزيرې خبري شبکې دا برید په کلکو ټکو غندلی او ویلي یې دي، چې دا د رسنيو پر ازادۍ یو ښکاره او له وړاندې پلان شوی عمل دی.
دغهراز د غزې دولتي د اطلاعاتو دفتر دغه برید په کلکو ټکو غندلی او دا یې «قصدي او له وړاندې پلان شوی» عمل بللی.
په دې سره د هغو خبریالانو شمېر، چې د اسرائیلي رژیم د بریدونو له پیل راهیسې یې په غزه کې ژوند بایللی، ۲۳۷ تنو ته رسېدلی دی.