د کډوالو او راستنېدونکو چارو وزیر مولوي عبدالکبیر د پکتیکا د مرستیال والي مخدوم عبدالسلام سعادت په ملتیا د بغلان، پروان او کاپیسا ولایتونو له یو شمېر مسولینو او مجاهدینو سره وکتل.
په دې ناسته کې د یادو ولایتونو مجاهدینو او ځينو ځایي مسولینو په دې سیمو کې روان حالت د ډاډ وړ یاد کړی او ویلي یې دي، چې د اسلامي امارت په هڅو، بشپړ امن حاکم دی او ولس له امنیتي ادارو سره ښه همغږي او همکاري لري.
دې مجاهدینو اسلامي امارت ته د خپلو وړاندېزونو پر مهال د یادو ولایتونو خلکو ته د کاري فرصتونو او اقتصادي ودې په موخه د یو لړ پراختیايي چارو د پيل غوښتنه کړې ده.
دوی د ځینو موضوعاتو په هکله خپل نظرونه او سلا مشورې له ښاغلي وزیر سره شریکې کړې دي.
مولوي عبدالکبیر د بغلان، پروان او کاپیسا مجاهدیتو ته ښه راغلاست ویلی او د جهادي دورې پر مهال یې د هغوي قربانۍ او هڅې د قدر وړ بللې دي.
نوموړي ویلي، چې اسلامي امارت د افغان ولس شریک ټغر دی او له توپير پرته هر افغان پکې حق لري.
د ناستې په پای کې ښاغلي وزیر د یادو درېیو ولایتونو مسولینو او مجاهدینو ته ډاډ ورکړی، چې پر وړاندېزونو به یې غور وشي او حللارې به ورته ولټوي.