د قوش تېپې ملي کانال د دوه ستر پلونو د جوړولو چارې ۹۹ سلنه بشپړې شوي او نیږدې ورځو کې به ګټې اخیستنې ته وسپارل شي.
انجنير روح الله اميري ویلي، د قوش تېپې ملي کانال د دوه ستر پلونو چې يو يې د موټرو او بل يې د ريل ګاډي لپاره دي د جوړولو چارې ۹۹ سلنه بشپړې شوي او په نیږدې ورځو کې به د ترافیکو پرمخ پرانستل شي.
د ښاغلي اميری په وينا؛ اوس مهال اوبه پلونو ته رسېدلې او د کانال د جوړولو چارې په چټکي روانې دي.
د بلخ ولايت مقام وياند زيد وايي؛ چې د قوشتېپې کانال ملي پروژې چاري په خورا چټکی سره رواني دي، د مزارشریف او حیرتان ښارګوټي ترمنځ دوه ستر پلونه نیږدې تکمیل شوي.
د نوموړي په وینا؛ د بلخ ولایتي اداره ټول ولس ته ډاډ او اطمینان ورکوي، چې د خپل صلاحیت اړوند به د مشرانو په لارښوونه د دې ملي پروژې په ټولو چارو کې مرسته کوي.
د مزارشريف ښار يو شمېر اوسېدونکي وايي، چې د دغه کانال په جوړولو سره به افغانستان تر ډېره اقتصادي او زراعتي ځان بسيايني ته ورسېږي.
قوشتیپې کانال ۲۸۵ کیلومتره اوږدوالی لري، چې د بلخ ولایت ـ کلداري ولسوالۍ د امو له سیند څخه پیلیږي او د فاریاب ولایت اندخوۍ ولسوالۍ کي ختمیږي.