د ایران د بهرنیو چارو وزیر سید عباس عراقچي له لوړ پوړو روسي چارواکو سره د لیدنې وروسته د تهران او مسکو ترمنځ تعامل باندې خوښي ښودلې او د دغه هېواد له ملاتړ او همغږۍ څخه یې مننه کړې ده.
ښاغلي عراقچي پر خپله اېکس پاڼه لیکلي: “موږ خوښ یو چې له روسیې سره تر ټولو په لوړه کچه تعامل لرو”
نوموړي دغه راز ویلي، چې وروستیو پېښو د ایران او روسیې ترمنځ د ستراتېژیکو اړیکو ژورتیا او پیاوړتیا ثابته کړې ده.
همدارنګه د روسیې د دفاع وزیر اندري بلوسوف ویلي، چې مسکو او تهران به د تېر په څېر په هر ډول شرایطو کې له یو بل څخه ملاتړ وکړي.
د ایرنا خبري اژانس د راپور له مخې، د روسیې د دفاع وزیر، د ایران د دفاع وزارت له مرستیال رضا طلایي نېک سره په لیدنه کې زیاته کړې، چې مسکو د ایران حاکمیت او ځمکنۍ بشپړتیا څخه ملاتړ کوي.