د ملي راډیوتلویزون عمومي رییس قاري محمد یوسف احمدي او د افغانستان د مخابراتي خدمتونو تنظیم ادارې (اترا) عمومي ریيس مولوي سید برات شاه آغا ندیم په اطلاعاتو او کلتور ریاست کې د مجاهد له ملي موزیم څخه لیدنې پر مهال د میدان وردګو ولایت د اطلاعاتو او کلتور له رییس مولوي حبیب الله مجاهد نه مننه کړې، چې د هېواد ازادۍ یاد ساتلو په پار یې د مجاهد په نوم موزیم جوړ کړی.
مولوي حبيب الله مجاهد ویلي؛ له موزیم څخه د جوړولو موخه یې د اشغالګرو پر وړاندې د مجاهدینو په لاس جوړې شوې او کاریدلې وسلې د تاریخ په کرښو ژوندۍ ساتل دي
مجاهد موزیم چې په ډیرو کمو امکاناتو جوړ شوی درې برخې لري، یوه برخه یې لرغونو آثارو ته ځانګړې شوې او دویمه برخه کې یې هغه نظامي توکي ساتل کیږي، چې مجاهدینو په خپل نوښت جوړ کړي او یایې له اشغالګرو څخه په غنیمت کې نیولي او دریمه برخه یې د شهیدانو اثاروته ځانګړې شوې ده.
د ملي راډیو تلویزون لوی رییس؛ په یوه پېړۍ کې د دریو زبرځواکونو د ماتې وياړ یوازې افغانان لري، او دا لمړی ځل دی چې دهغه مجاهدينو په لاس جوړ شوي نظامي آثار او له اشغالګرو څخه غنیمت شوي توکي په موزیم کې ساتل کيږي، چې د نړی لویې امپراتورۍ او ملګري یې په خالي لاس په ګونډو کړل.
بل خوا د افغانستان مخابراتي خدمتونو د تنظیم ادارې (اترا) عمومي رییس؛ د دې موزیم په لیدو سره به ۲۰ کلنه جهادي دوره کې د اشغالګرو ظلمونه، او د همدې وحشتونو او ظلمونو پر وړاندې د ولسونو او مجاهدینو قربانۍ، د شهیدانو اتلولۍ د اسلامي نظام د حاکمیت ساتلو ته راتلونکي نسلونه و هڅول شي.