د کرنې او مالداري سکټور د پانګوالو او متشبثینو ستونزو د حل په موخه د هڅو په دوام د کرنې او مالداري سرپرست وزیر مولوي عطاءالله عمري د افغانستان د کرنې او مالداري خونې له یو شمېر غړو او پانګوالو سره لیدنه وکړه او د دوی ستونزې یې واورېدې.
دا لیدنه د کرنې او مالداري وزارت او د افغانستان د کرنې او مالداري خونې ترمنځ د کرنې او مالداري په برخه کې د پانګوالو د ستونزو د حل او د کرنې وزارت او افغانستان د کرنې او مالداري خونې ترمنځ د لاسلیک شوي هوکړه لیک د چارو تعقیب او تطبیق په موخه جوړه شوې وه.
په دې لیدنه کې د هېواد د بېلا بېلو ولایتونو پانګوالو په مختلفو برخو کې خپل نظریات، وړاندیزونه او ستونزې د کرنې له وزیر سره شریکې او د حل غوښتنه یې کړې ده.
مولوي عطاء الله عمري د هېواد د کرنې او مالداري سکټور په وده او پراختیا کې د پانګوالو رول مهم بللی او یادو سوداګرو ته یې د کرنې وزارت د امکاناتو په حدودو کې د هر ډول همکارۍ ډاډ ورکړی دی.