د افغانستان اسلامي امارت د بهرنیو چارو وزارت وايي؛ د پاکستاني پوځیانو له لوري د افغانستان پر پکتیکا او خوست ولایتونو د بریدونو په غبرګون کې، چې په پایله کې یې ښځینه او ماشومان شهیدان شوي، کابل کې د یاد هېواد د سفارت سرپرست احضار او احتجاجلیک یې ورته سپارلی.
یاد وزارت زیاته کړې: “د دې بریدونو د غندنې ترڅنګ پاکستان ته وریادوو، چې د افغانستان اسلامي امارت د نړۍ د زبرځواکونو پرخلاف د ازادۍ د اوږدې مبارزې تجربه لري او په خپله خاوره تېري په هېڅ ډول نه شي زغملی.”
بهرنیو چارو وزارت ټینګار کړی، چې د پاکستان نوی ملکي حکومت او ولس باید پرېنږدي، چې ځینې کړۍ په غیرې مسولانه کړنو او ناسمو پالیسیو د دوو مسلمانو ګاونډیو هېوادونو اړیکې پېچلې کړي.
د یادونې وړ ده، چې پاکستاني پوځیانو تېره شپه پر پکتیکا او خوست ولایتونو هوايي برید کړی، چې ښځې او ماشومان پکې شهیدان شوي دي.