د افغانستان اسلامي امارت د کابينې نوولسمه غونډه دوشنبه (رمضان المبارک ۸مه/ کب ۲۸) د ریيس الوزرا ملا محمدحسن اخوند په مشرۍ ترسره شوې، چې په کې په يو شمېر موضوعاتو بحث او پرېکړې شوي دي.
غونډه کې د ترافيکي پېښو مخنيوي او موټرو د سرعت کنټرول په اړه هر اړخیزې خبرې شوي او کورنيو چارو وزارت ته دنده سپارل شوې، چې د سترې محکمې، ټرانسپورټ او هوايي چلند او ټولګټو وزارت په ګډه د لويو لارو په اوږدو کې د موټرو د تګ او سرعت اندازې معلومولو لپاره ترافيکو ته د اړينو وسايلو چمتو کولو طرحه جوړه کړي او د رياست الوزرا مقام سره دې شريکه کړي.
همدا راز په دې غونډه کې د رياست الوزرا اداري مرستيال مولوي عبدالسلام حنفي په مشرۍ د کورنيو چارو، بهرنيو چارو، کرنې، اوبو لګولو او مالدارۍ، کور او ښار جوړولو، د سرحدونو، قومونو او قبايلو چارو وزارتونو، استخباراتو لوی رياست او احصايې ملي ادارې څخه تشکيل شوي پلاوي ته دنده سپارل شوې، چې د ولسوالیو جغرافیوي حدودو تثبیت کړي، په اړه يې معلومات وکړي او راپور يې له یوځای کېدو وروسته د رياست الوزرا مقام ته وړاندې کړي.
همداراز د کابينې په دې غونډه کې اقتصاد وزارت ته دنده سپارل شوې، چې موسساتو ته واضحه کړي، چې هيڅ امارتي کارمند تر هغو نشي جذبولی، ترڅو يې قانوني موده نه وي پوره شوي.