د ملګرو ملتونو سرمنشي انتونیو ګوتریش د خپل کلني سفر په ترڅ کې غزې ته سفر کړی.
نوموړي د غزې اړوند رفح ښار په یوه سرحدي سیمه کې خبریالانو ته ویلي؛ اوس یې وخت دی، چې غزه کې سملاسي اوربند رامنځته او روانې وژنې ودرېږي.
نوموړي ویلي، چې غزې ته د بشري مرستو وړنکو لاریو اوږده قطارونه ولاړ دي او پر غزه وېرونکې لوږه خپره ده او دا له ویر بدتره حالت دی. دغهراز په دې سیمه کې به نوره وژنه حالات لا بدتر کړي.
د یادونې وړ ده، چې د غزې الشفا روغتون له شپږو ورځو راهیسي د صهیونیستي اشغالګرو له لوري محاصره او تر بریدونو لاندې دی او تر اوسه سلګونه روغتیايي کارکوونکي، ناروغان او پناه اخیستونکي شهیدان او یا ټپیان شوي دي.
یدیعوت احارانوت ورځپاڼې د صیونیستي پوځ په حواله ویلي، چې په الشفا روغتون د بریدونو له امله ۱۷۰ فلسطینیان وژل شوي او له ۸۰۰ ډېر نیول شوي دي.
حماس په الشفا روغتون کې د صهیونیستي رژیم د جنایاتو په تړاو د نړۍ خاموشي ځورونکې ګڼلې ده.
پر غزه د صهیونیستي رژیم د بریدونو له پیل راهیسي ۳۲ زره او ۷۰ فلسطینیان شهیدان او نږدې ۷۴ زره نور ټپیان شوي دي.