د بهرنیو چارو له سرپرست وزیر مولوي امیرخان متقي سره د پاکستان د سوداګرۍ وزارت مرستیال محمد خرم آغا او ورسره راغلي پلاوي لیدنه کړې.
په دې لېدنه چې موخه یې د سوداګریزو، ترانزيټي او اقتصادي اړیکو پیاوړتیا وه؛ په پیل کې د بهرنیو چارو سرپرست وزیر د دواړو هېوادونو ترمنځ په یادو برخو کې پر شته ستونزو او د هغوی پر حل لارو هر اړخیزې خبرې کړي دي.
دغه راز مولوي امیرخان متقي د دواړه هېوادونو ګډو مشترکاتو او ولسي ارزښتونو ته د درناوي په اړه ویلي، حکومتونه یې د ټینګښت مسولیت لري.
ښاغلي متقي همداراز لازمه ګڼلې، چې په سوداګرۍ او ترانزيټ برخو کې دې د شته ستونزو د حل لپاره هم په ګډه او مخلصانه ډول اقدامات وشي.
د پاکستان د سوداګرۍ وزارت مرستیال له افغان حکومت څخه افغانستان ته د عوت ورکولو له امله د مننې ترڅنګ ویلي، دوی د افغانستان د صنعت او سوداګرۍ وزارت له مسولینو سره په خبرو بوخت دي او زیاته کړې یې ده، په لند وخت کې به په یادو ساحو کې ټولو شته ستونزو ته د امکان تر بریده د حل لارې ومومي.
د ناستې په پای کې دواړه لوریو د سوداګریزو او ترانزیټي اړیکو د پراختیا او پیاوړتیا ترڅنګ د ډیورنډ پر فرضي کرښه په عبوري لارو کې د مسافرو، ناروغانو او سوداګرو د تګ راتګ په اړه د اسانتیاوو په رامنځته کولو ټینګار کړی دی.