د امربالمعروف او نهی عنالمنکر وزارت مسولینو پرون په یوه خبري کنفرانس کې د عالیقدر امیرالمؤمنین حفظه الله له لوري د دې وزارت د شکایتونو اوریدلو د نوي قانون له تصویب او توشیح څخه خبر ورکړ.
د دې وزارت د شکایتونو اوریدلو مرستیال شیخ سید علي صدیق الله وایی؛ دا قانون یوه مقدمه، دوه فصلونه او ۲۳ مادې لري چې له دې وروسته په ټولو امارتي ادارو کې د تطبیق وړ دی.
دغهراز د یاد وزارت د شکایتونو اوریدلو او تصنیف رییس مولوي موسی کلیم عاصم وایی، چې د دې قانون د دویمې مادې له مخې ټولې امارتي ادارې د خلکو شکایتونو او عدالت تامین لپاره مکلفې دي.
د امربالمعروف، نهی عنالمنکر او شکایتونو اوریدو وزارت مسولین زیاتوي، چې د دې وزارت دوه سوه کارکونکي شپه او ورځ د خلکو شکایتونو ته رسیدنه کوي او په ټولو امارتي ادارو کې د شکایتونو اوریدلو صندوقونه نصب شوي دي.