د کلیو د بیارغونې او پراختیا وزارت سرپرست وزیر ملا محمد یونس اخوندزاده په افغانستان کې د ملګرو ملتونو د ځانګړي استازي له مرستیال اندریکا راتوتي او مل پلاوي سره لیدنه کړې.
افغانستان کې د ملګرو ملتونو مرستیال د خپلو فعالیتونو په اړه سرپرست وزیر ته معلومات ورکړي او ويلي يي دي؛ د کلیو د بیارغونې او پراختیا وزارت یو مهم او سکتوري وزارت دی، چې په کلیوالې سیمو کې د پروژو پلې کولو کې مهم رول لري او غواړو چې د بشرې مرستو څخه د پراختیایې پروژو د پلي کېدو په لور روان شو.
راتوتي د مهمو پروژو په ځانګړي ډول د واش په برخه کې د وزارت له همکاریو څخه مننه کړې او زیاته کړې يي ده، موږ پلان لرو ترڅو د اوبو رسولو په برخه کې د دغه وزارت سره لا زیات کار وکړو.
د کلیو د بیارغونې او پراختیا سرپرست وزیر ویلي، د پراختیایې پروژو پلې کول یو مهم او اړین ګام دی او باید تر بشري مرستو بنسټیزو پروژو ته لومړیتوب ورکړل شي.
ملا محمد یونس اخوندزاده د خپلو خبرو په ترڅ کې زیاته کړې؛ زموږ مسولیت دا دی، څو د خلکو د لومړیتوبونو په پام کې نیولو سره پروژې په روڼ ډول او ښه کیفیت ترسره شې، ترڅو هېوادوالو ته یې تلپاتې ګټه ورسیږي.
همداراز دواړو لورو پر دوامدارو همکاریو ټینګار کړی دی.