د افغانستان اسلامي امارت د کابينې شلمه غونډه تېره ورځ دوشنبه «رمضان المبارک ۲۲مه/ وري۱۳مه» د ریيس الوزرا ملا محمدحسن اخوند په مشرۍ ترسره شوې، چې په کې په يو شمېر موضوعاتو بحث او پرېکړې شوې دي.
غونډه کې له هر اړخيز بحث وروسته د ترافيکي پېښو د مخنيوي طرحه چې د کورنيو چارو وزارت له لوري چمتو شوې وه؛ تایيد شوې او اړوندو ارګانونو ته دنده سپارل شوې ترڅو ياده طرحه پلي کړي.
همداراز په غونډه کې مالدارو سره د موسساتو له لوري د شويو مرستو راپور وړاندې شوی او اقتصاد وزارت ته دنده سپارل شوې، چې په راتلونکې کې خپلې چارې د طرزالعمل مطابق له اړوندو ادارو سره په همغږۍ سرته ورسوي.