د کرنې وزارت ویلي؛ د عاليقدر امیرالمؤمنین حفظه الله د لارښوونې سره سم، د هېواد په بېلابېلو ولایتونو کې د کرنې، اوبولګولو او مالدارۍ وزارت له خوا په جوړو شویو چک ډېمونو کې اوبه زېرمه شوي دي.
یاد وزارت زیاته کړې؛ د عالیقدر امیرالمؤمین حفظه الله د لارښونې له مخې په لسو ولایتونو (اروزګان، کندهار، تخار، جوزجان، بدخشان، ننګرهار، لغمان، فاریاب، بامیان او داکندي) کې د ۴۱۴ میلیونه افغانیو په لګښت د ۱۳۸ چکډېمونو د جوړولو چارې د کرنې، اوبولګولو او مالدارۍ وزارت ته سپارل شوې وې، چې د کرنې، اوبولګولو او مالدارۍ وزارت له خوا یې د جوړېدو چارې په ښه توګه پرمخ تللي دي.
د دې وزارت په وینا؛ دغه چکډېمونه د وچکالۍ د زیانونو د کمولو، د سېلابونو مخنیوي، د موسمي اوبو مدیریت، د ځمکې لاندې اوبو د کچې لوړولو، د خاورې د خرابېدو مخنیوي او د یادو سیمو د رسوبي موادو مدیریت لپاره جوړ شوي دي.
د کرنې وزارت: د هېواد په بېلابېلو ولایتونو کې جوړ شوي چکډېمونه له اوبو ډک شوي
