د اسلامي علماوو نړیوالې ټولنې د یوې بیانیې په خپرولو سره د صهیونیسټي رژیم له ظلم او تېري سره د هر اړخیزې مبارزې غوښتنه کړې.
دې اتحادیې پر اسلامي ټولنه غږ کړی چې په غزه کې د نسل وژنې د مخنیوي لپاره اقدام وکړي.
په یاده بیانیه کې یو ځل بیا د صهیونیستي رژیم وحشیانه جنایتونه غندل شوي او له نړیوالې ټولنې غوښتل شوي، چې له کوچني اختره وړاندې دې په غزه کې سملاسي اوربند ټینګ کړي.
په بیانیه کې دغه راز غزې ته د بشري مرستو د رسولو لپاره د لارو په بیا پرانیستلو ټینګار شوی او له خلکو، نړیوالو بنسټونو او حقوقي سازمانونو غوښتل شوي، چې پر خپلو حکومتونو فشار راوړي ترڅو د صهیونیستي رژیم له مالي، پوځي او سیاسي همکاري څخه ډډه وکړي.
حال دا چې نن سهار صهیونیستي رژیم د یوې غیرې انساني کړنې په ترڅ کې د اوښکو بهوونکي ګاز په واسطه د الاقصی جومات په لمونځ کوونکو برید وکړ او یو شمېر فلسطینیان یې هم ونیول.
د روژې مبارکې میاشتې د وروستۍ جمعې په مناسبت چې د قدس له نړیوالې ورځې سره هم برابره ده، څه باندې ۵۶ زره لمونځ کوونکو د سهار په لمانځه کې ګډون کړی وو.