د افغانستان اسلامي امارت د رياست الوزرا سياسي مرستيال مولوي عبدالکبیر د ترکي خیریه بنسټونو مسولینو او استازو سره لیدنه وکړه.
په پيل کې د دغو خيريه بنسټونو مسولينو د ریاست الوزرا سیاسي مرستیال ته په افغانستان کې د خپلو فعالیتونو اړوند معلومات ورکړي او د اسلامي امارت له همکاري یې په مننې ویلي، چې د بيارغاونې، یتیمانو لاسنیوي، خوراکي توکو وېش، روغتیا او په يو شمېر نورو برخو کې اړمنو افغانانو ته خدمتونه وړاندې کوي او ډاډ يې ورکړی، چې د غيرې سیاسي بنسټونو په توګه به خپلو فعالیتونو ته دوام ورکړي.
د دغو ترکي خیریه بنسټونو د مسولينو په وینا؛ دا مهال له حکومتي ادارو سره په همغږۍ د جوماتونو او مدرسو رغولو تر څنګ، بې سرپرسته مېرمنو ته د مناسبو کاري فرصتونو رامنځته کولو، د کوکنارو بدیل کښت او د روږدو درملنې پروژې هم تر لاس لاندې لري.
د ریاست الوزراء سیاسي مرستیال هېواد کې د ترکي خیریه بنسټونو له فعالیت څخه مننه کړې او ویلي یې دي، چې د بشپړ امنیت په ټینګښت سره افغانستان کې د خیریه کارونو او پانګونې غوره زمینه برابره شوې او د اسلامي امارت له لوري یې د هر ډول همکاریو ډاډ ورکړی دی.
مولوي عبدالکبیر له افغانانو سره په ځینو برخو کې مرستو ته په اشارې ویلي، چې د تېرو څو لسیزو ناخوالو له امله افغانان په بېلابېلو برخو کې همکاريو او مرستو ته اړتیا لري.
په پای کې د رياست الوزرا سیاسي مرستیال ترکیه د افغانستان دوست هېواد یاد کړی او د دواړو لوريو تر منځ یې د مثبتو اړیکو پر پیاوړتیا ټینګار کړی.